కరోనా మహమ్మారికి పరిష్కారం కనిపెట్టే దిశగా అంతర్జాతీయ సమాజం చేస్తున్న కృషి ఫలిస్తుందని రాష్ట్రపతి రామ్నాథ్ కోవింద్ ఆశాభావం వ్యక్తం చేశారు. త్వరలోనే మహమ్మారి సృష్టించిన సంక్షోభం నుంచి విముక్తి లభిస్తుందని పేర్కొన్నారు. ఆరోగ్యం, మానవత్వం విషయంలో ప్రపంచ దేశాల మధ్య పరస్పర సహకారం అవసరమనే విషయాన్ని కొవిడ్ మహమ్మారి గుర్తు చేసిందని అన్నారు.
వివిధ దేశాల నుంచి భారత్కు కొత్తగా రాయబారులుగా వచ్చిన వారు బాధ్యతలు చేపట్టే కార్యక్రమంలో వీడియో కాన్ఫరెన్స్ ద్వారా పాల్గొన్నారు రాష్ట్రపతి. హంగేరీ రాయబారి ఆండ్రాస్, మాల్దీవుల హైకమిషనర్ హుసేన్ నయాజ్, చాద్ రాయబారి సౌంగుయ్ అహ్మద్, తజికిస్థాన్ ప్రతినిధి లుక్మాన్ నుంచి క్రెడెన్షియల్స్ స్వీకరించారు. ఈ నాలుగు దేశాలతో భారత్ ఎల్లప్పుడూ సత్సంబంధాలను కొనసాగిస్తుందని కోవింద్ తెలిపారు. శాంతి, సౌభ్రాత్రం అంశాల్లో ఉమ్మడిగా కలిసి సాగుతుందని పేర్కొన్నారు.
ఐక్యరాజ్య సమితి భద్రతా మండలిలో తాత్కాలిక సభ్యదేశంగా భారత్ ఉండేందుకు మద్దతు తెలిపినందుకు గాను.. కోవింద్ ఆ దేశాలకు కృతజ్ఞతలు చెప్పారు.
ఇదీ చూడండి:రాష్ట్రపతి రచనలను ఆవిష్కరించిన రాజ్నాథ్
