జమ్ముకశ్మీర్లో దాడులు చేయడానికి పాక్ ఆధారిత ఉగ్రసంస్థలు కుట్ర పన్నాయన్న నిఘా సమాచారం మేరకే అదనపు భద్రతా బలగాలు మోహరించామని కేంద్ర ప్రభుత్వ వర్గాలు స్పష్టంచేశాయి. జాతీయ భద్రతా సలహాదారు అజిత్ ఢోబాల్ పరిస్థితిని ఎప్పటికప్పుడు పర్యవేక్షిస్తున్నట్లు వెల్లడించాయి. 'ఆర్టికల్ 35 ఏ రద్దు' చేస్తారనే వదంతలు సహా జమ్ముకశ్మీర్లోని వివిధ రాజకీయ పార్టీలు భద్రతా బలగాల మోహరింపుపై ఆందోళన వ్యక్తం చేసిన నేపథ్యంలో ప్రభుత్వ వర్గాలు ఈ ప్రకటన చేశాయి.
డోభాల్ పర్యటనతో.... రగడ మొదలు
జాతీయ భద్రతా సలహాదారు అజిత్ డోభాల్ మూడు రోజుల పర్యటనలో జమ్ముకశ్మీర్లోని పోలీసులు, పారామిలటరీ, సైనికి, పౌర అధికారులతో విస్తృత చర్చలు జరిపారు. నిఘా సంస్థలతోనూ సమాలోచనలు చేశారు. ఈ సందర్భంగా క్షేత్రస్థాయిలో తలెత్తే పరిస్థితులను ఎదుర్కోవడానికి అత్యవసర ప్రణాళికను ఉన్నతాధికారులు సిద్ధం చేశారు.
భద్రతాదళాల మోహరింపు
అజిత్ డోభాల్ పర్యటించి వచ్చాక.. జమ్ముకశ్మీర్లో భద్రతను కట్టుదిట్టం చేయడానికి భద్రతా సిబ్బందిని తరలించాలని కేంద్రం నిర్ణయించింది. కేంద్ర సాయుధ పోలీసు బలగాల నుంచి 100 కంపెనీలను తక్షణం అక్కడకు పంపాలని ఆదేశించింది.
పటిష్ట బందోబస్తు
కేంద్రం ఆదేశం మేరకు జమ్ముకశ్మీర్లోని విమానాశ్రయాలు, విద్యుత్ ఉత్పత్తి కేంద్రాలు, విద్యుత్ గ్రిడ్లు నీటి సరఫరా, ఆసుపత్రులు, భద్రతా శిబిరాల వద్ద బలగాలను మోహరిస్తున్నారు. అల్లర్లను సృష్టించే అవకాశమున్న వారి పేర్లుతో జాబితా సిద్ధం చేస్తున్నారు. జాతి వ్యతిరేక శక్తులను ముందుగానే అదుపులోకి తీసుకునేందుకు అవకాశముందని సంబంధిత వర్గాలు తెలిపాయి.
కశ్మీర్లో ఉగ్రవాద నిరోధక చర్యలు, శాంతి భద్రతలను పటిష్టం చేయటానికే ఈ నిర్ణయం తీసుకున్నట్లు అధికారులు తెలిపారు.
ఆర్టికల్ 35ఏ రద్దుకేనని విమర్శలు
కేంద్ర ప్రభుత్వం తీసుకున్న ఈ నిర్ణయంపై రాష్ట్రంలోని ప్రధాన ప్రాంతీయ పార్టీలైన నేషనల్ కాన్ఫరెన్స్, పీపుల్స్ డెమోక్రాటిక్ పార్టీ, జమ్ము అండ్ కశ్మీర్ పీపుల్స్ మూవ్మెంట్లు ఆందోళన వ్యక్తం చేశాయి. కశ్మీరీలకు ప్రత్యేక హక్కులు కల్పిస్తున్న ఆర్టికల్ 35 ఏను కేంద్రం రద్దు చేయడానికి కేంద్రం ప్రయత్నిస్తోందంటూ ఆరోపించాయి.
తప్పుపట్టిన మెహబూబా
జమ్ముకశ్మీర్లో అదనపు బలగాల మోహరింపు నిర్ణయాన్ని మాజీ ముఖ్యమంత్రి మెహబూబా ముఫ్తీ తప్పుపట్టారు. రాష్ట్రంలో ఉన్నది రాజకీయ సమస్య అని, దాన్ని సైనిక పద్ధతిలో పరిష్కరించుకోవాలనుకోవడం సరికాదన్నారు.
అదనపు బలగాల మోహరింపు నిర్ణయం జమ్ముకశ్మీర్ ప్రజలను భయాందోళనలకు గురిచేస్తోందని పీపుల్స్ కాన్పరెన్స్ ఛైర్మన్ సజాద్ గనీ లోనీ పేర్కొన్నారు.
ఉగ్రచర్యలు అడ్డుకోవడానికే..
విపక్షాల ఆందోళనలపై స్పందించిన అజిత్ డోభాల్... ఉగ్రచర్యలను అడ్డుకోవడానికి మాత్రమే అదనపు భద్రతా బలగాలను సరిహద్దుల్లో మోహరించామని పేర్కొన్నారు.
ఆర్టికల్ 35 ఏ అంటే..
రాజ్యాంగంలోని ఆర్టికల్ 35 ఏ జమ్ముకశ్మీర్కు ప్రత్యేక ప్రతిపత్తి కల్పిస్తోంది. దీని ప్రకారం జమ్ముకశ్మీర్లో శాశ్వత నివాసితుల హోదాను నిర్వచించే సంపూర్ణ అధికారం ఆ రాష్ట్రశాసన సభకు ఉంటుంది. ఆ రాష్ట్ర పౌరులకు ప్రత్యేక హక్కులు లభిస్తాయి. ఈ అధికరణం కింద రాష్ట్ర శాసనసభ తీసుకునే ఎలాంటి చర్యలనూ రాజ్యాంగ ఉల్లంఘనగా పరిగణించడం కుదరదు.
ఇదీ చూడండి: కర్ణాటకీయం: 14 మంది రెబల్ ఎమ్మెల్యేలపై వేటు
