బిహార్ ఎన్నికల్లో నిరుద్యోగంతో పాటు ఉల్లగడ్డల ధరల పెరుగుదల, ద్రవ్యోల్బణం కూడా ప్రధాన అంశాలుగా మారినట్లు పేర్కొన్నారు రాష్ట్రీయ జనతా దళ్(ఆర్జేడీ) నాయకుడు, మహాకూటమి ముఖ్యమంత్రి అభ్యర్థి తేజస్వీ యాదవ్. సీఎం నితీశ్ కుమార్ నాయకత్వంలో రాష్ట్రంలో రూ.30వేల కోట్ల విలువైన 60 కుంభకోణాలు జరిగాయని ఆరోపించారు.
తాము అధికారంలోకి వస్తే 10 లక్షల ఉద్యోగాలు కల్పిస్తామనే హామీ తర్వాత.. ధరల పెరుగుదలను ప్రధాన అస్త్రంగా చేసుకున్నారు తేజస్వీ. ప్రభుత్వంపై విమర్శలు గుప్పించారు.
" ద్రవ్యోల్బణం అనేది అతిపెద్ద అంశం. ప్రస్తుతం ఉల్లిపాయల ధర కిలోకి రూ.100కి చేరింది. ఉల్లి ధరలు రూ.50-60 మధ్య ఉన్నప్పుడు మాట్లాడిన వారు.. ఇప్పడు మౌనంగా ఉంటున్నారు. రాష్ట్రంలో క్షుద్బాధ, పేదరికం పెరిగిపోతున్నాయి. నిరుద్యోగం పెరిగింది. చిరు వ్యాపారాలు దెబ్బతిన్నాయి. జీడీపీ క్షీణిస్తోంది. ఆర్థిక సంక్షోభంలోకి కూరుకుపోతున్నాం. రైతులు తీవ్రంగా నష్టపోయారు. బిహార్ పేద రాష్ట్రంగా మారటం వల్ల ప్రజలు.. విద్య, ఉద్యోగాలు, వైద్య సహాయం కోసం వలస పోతున్నారు. "
- తేజస్వీ యాదవ్, ఆర్జేడీ నేత
నితీశ్పై విమర్శలు..
రాష్ట్రంలో విపత్తుల సమయంలో ఖర్చు చేస్తున్న నిధులపై ఆడిట్ జరగటం లేదని, అవినీతి పెరిగిపోయిందని ఆరోపించారు తేజస్వీ. లంచం లేకుండా ఏ పని జరగటం లేదన్నారు. ఆ సంప్రదాయాన్ని నితీశ్ జీ రూపొందించారని విమర్శించారు.
ఇదీ చూడండి: ఆర్జేడీ హామీలు: 10లక్షల ఉద్యోగాలు- రుణ మాఫీ
