ప్రఖ్యాత భారతీయ సైకత కళాకారుడు పద్మశ్రీ సుదర్శన్ పట్నాయక్‌కు అరుదైన గౌరవం దక్కింది. బోస్టన్లో నిర్వహించిన '2019 రివర్ బీచ్ అంతర్జాతీయ సైకత శిల్ప ఉత్సవం'లో సుదర్శన్కు 'పీపుల్స్ ఛాయిస్' అవార్డు వరించింది. ఈ పోటీలకు ప్రపంచవ్యాప్తంగా 15 మంది అగ్రశ్రేణి సైకత కళాకారులను ఎంపికచేయగా వారిలో సుదర్శన్ పట్నాయక్ ఒకరు.
సముద్రాల్లో ప్లాస్టిక్ కాలుష్యంపై రూపొందించిన సైకత శిల్పానికి సుదర్శన్ ఈ అవార్డు పొందారు. ‘'ప్లాస్టిక్ కాలుష్యాన్ని ఆపండి, సముద్రాలను కాపాడండి'’ అనే సందేశంతో సైకతశిల్పాన్ని రూపొందించారు పట్నాయక్.
"ఇది నాకు చాలా పెద్ద గౌరవం, ఈ అవార్డు భారతదేశానికి దక్కింది. ప్లాస్టిక్ కాలుష్యాన్ని తగ్గించే విషయంలో భారత్ చాలా కృషిచేస్తోంది. "
- సుదర్శన్ పట్నాయక్, సైకత శిల్పి.
ఒక్క శిల్పంలో అన్నీ..
ప్లాస్టిక్ సంచిలో తాబేలు ఇరుక్కున్నట్లు, చేపల శరీరంలో చెప్పులు, ప్లాస్టిక్ సీసాలు, గ్లాసులు ఉన్నట్లుగా ఆయన శిల్పాన్ని రూపొందించారు. చేప తోక ఒక మనిషి నోట్లో ఉన్నట్లుగా ఏర్పాటు చేసి.. మనుషుల మీద సముద్ర కాలుష్య ప్రభావం ఎలా పడుతోందో చూపించారు.
రివర్ బీచ్ భాగస్వామ్య బోర్డు సభ్యుడు ఆడ్రిన్‌ సాకో మాగైర్‌ నుంచి పట్నాయక్ ఈ అవార్డు స్వీకరించారు. ఆయనకు ఈ అవార్డు రావడంపై న్యూయార్క్‌లోని భారతీయ కాన్సల్‌ జనరల్‌ సందీప్‌ చక్రవర్తి హర్షం వ్యక్తంచేశారు.
ఇదీ చూడండి: అఫ్గాన్ ఉపాధ్యక్ష అభ్యర్థి లక్ష్యంగా బాంబు దాడి
