ఇండోనేసియా వరిపైరును భారత్లో సాగు చేస్తూ.. ఎందరో అన్నదాతలకు లాభాల బాటచూపాడు మహారాష్ట్రకు చెందిన ఓ రైతు.
అహ్మద్నగర్, మెహందురీకి చెందిన వికాస్ అరోటే మెకానికల్ ఇంజినీరింగ్ చదివాడు. కానీ, అనుకోకుండా తన మనసు వ్యవసాయం వైపు మళ్లింది. వ్యవసాయానికి వినూత్నతను, సాంకేతికతను జోడించి ప్రయోగాలు చేయాలనుకున్నాడు. ఇందుకోసం, బంతిపువ్వు విత్తనాలు తెచ్చుకునేందుకు ఓ సారి అసోం వెళ్లాడు. అక్కడే, తనకు నలుపు, నీలి రంగులోని వరి పంట కంటబడింది. వెంటనే అసోం వ్యవసాయ శాఖకు చెందిన రావుసాహేబ్ బింద్రేను సంప్రదించి వివరాలు సేకరించాడు.
ఇండోనేసియాలో విరివిగా పండించే ఈ నీలి రంగు వరి.. భారత్- ఇండోనేసియాల మధ్య కుదిరిన వాణిజ్య ఒప్పందం తర్వాత మన దేశానికి వచ్చిందని తెలుసుకున్నాడు వికాస్. 3 కిలోల నీలి వరి విత్తనాలను మహారాష్ట్రకు తీసుకొచ్చాడు. 5 ఎకరాల్లో వాటిని చల్లి 200 కిలోల విత్తనాలను ఉత్పత్తి చేశాడు. ఆపై, తాను పండించిన విత్తనాలు 20 ఎకరాల్లో సాగు చేసి సత్ఫలితాలు పొందాడు.
ఈ నీలి వరిని ఇప్పటివరకు కేవలం అసోం, మణిపుర్, పంజాబ్ రాష్ట్రాల్లో సాగు చేసేవారు. కానీ, వికాస్ను ఆదర్శంగా తీసుకొని అకోలే తాలూకా ధామన్వన్, షర్పుంజే ప్రాంతాల్లో దాదాపు 20 మంది రైతులు ఈ ఇండోనేసియా వరిని సాగు చేయడం ప్రారంభించారు.
ఫైబర్, ఐరన్, కాపర్, యాంటీ ఆక్సిడెంట్లు అధికంగా ఉండే ఈ బియ్యానికి ప్రపంచ వ్యాప్తంగా గుర్తింపు ఉంది. పెద్ద పెద్ద హోటళ్లలో భారీగా డిమాండ్ ఉంది. భారత మార్కెట్లో 'అసోం బ్లాక్ రైస్'గా పిలిచే ఈ నీలి బియ్యం కిలో రూ. 300-500 ధర పలుకుతోంది.
మహారాష్ట్ర ముఖ్యమంత్రి ఉద్ధవ్ ఠాక్రే గుర్తించి సహకారం అందిస్తే.. భవిష్యత్తులో ఈ నీలి బియ్యాన్ని ఎగుమతి చేయాలనుకుంటున్నాడు వికాస్.
ఇదీ చదవండి: చిలుకకు సమాధి.. ఇది ఎప్పుడైనా విన్నారా?
