ఏఎన్​-32 విమానంలో గల్లంతైన వారంతా మృతి

అరుణాచల్ ప్రదేశ్‌లోని ఓ మారుమూల ప్రాంతంలో కుప్పకూలిన ఏఎన్​-32 విమానంలోని అందరూ మరణించినట్లు భారత వాయుసేన ప్రకటించింది. ప్రమాద సమయంలో విమానంలో ప్రయాణించిన 13 మంది ప్రాణాలు కోల్పోయినట్లు వెల్లడించింది.

జూన్‌3వ తేదీన అరుణాచల్​ ప్రదేశ్​ సియాంగ్ జిల్లా పయూమ్‌ పరిధిలో ఏఎన్​-32 విమానం గల్లంతయింది. ఈ విమానంలో ప్రయాణించిన వారంతా ప్రాణాలు కోల్పోయినట్లు భారత వాయుసేన అధికారికంగా ట్విట్టర్​ ద్వారా తెలిపింది.

విమాన శకలాలను గుర్తించిన ప్రాంతాన్ని బుధవారం తనిఖీ బృందాలు జల్లెడ పట్టాయి. ఈ గాలింపులో ఎవరూ సజీవంగా లేరని వెల్లడైంది. అమర వీరులకు నివాళులు అర్పించిన భారత వాయుసేన.. వారి ఆత్మకు శాంతి చేకూరాలని ప్రార్థిస్తున్నట్లు పేర్కొంది. బాధిత కుటుంబాలకు అండగా ఉంటామని హామీ ఇచ్చింది.

ఏం జరిగింది..?

జూన్ 3 మధ్యాహ్నం 12.25 గంటలకు అసోంలోని జోర్హాట్​ వైమానిక స్థావరం నుంచి బయలుదేరింది ఏఎన్​-32 విమానం. కొద్ది సేపటికే విమానం గల్లంతైంది. అది అరుణాచల్ ప్రదేశ్​ మెన్చుకా అడ్వాన్స్ ల్యాండింగ్ గ్రౌండ్​కు చేరుకోవాల్సి ఉంది. ఇందులో 8 మంది సిబ్బంది, ఐదుగురు ప్రయాణికులు కలిపి 13 మంది ఉన్నారు.

• ఇదీ చూడండి: 'ఈ తరహా దాడులు జరక్కుండా చూడాలి'