ఐరాస భద్రతా మండలిలో.. ఉగ్రవాదంపై తాము ప్రకటన చేసినట్టు పాకిస్థాన్ చేసిన వ్యాఖ్యలను భారత్ ఖండించింది. అవన్నీ అసత్యమని తేల్చిచెప్పింది. భద్రతా మండలిలో పాక్ అసలు సభ్యదేశమే కాదని గుర్తుచేసింది. ఈ నేపథ్యంలో పాక్ తప్పుడు ప్రకటనలపై ఐరాసకు లేఖ రాసింది.
అంతర్జాతీయ శాంతి, భద్రత అంశాలను చర్చించేందుకు.. ఈ నెల 24న ఐరాస భద్రతా మండలి సమావేశమైంది. ఆన్లైన్ ద్వారా జరిగిన ఈ భేటీలో తాము కూడా వ్యాఖ్యానించినట్టు ఐరాసలో పాకిస్థాన్ శాశ్వత ప్రతినిధి ప్రకటించారు.
తాజాగా.. ఈ ప్రకటనను భారత విదేశాంగ శాఖ ప్రతినిధి అనురాగ్ శ్రీవాస్తవ ఖండించారు. పాక్ ప్రకటనలు అసత్యమని పేర్కొన్నారు. యూఎన్ఎస్సీలో సభ్య దేశం కాని పాక్కు మాట్లాడే హక్కు లేదని గుర్తుచేశారు. ఇదే విషయాన్ని సమావేశంలో పాల్గొన్న ఇండోనేషియా అనధికారికంగా ధ్రువీకరించినట్టు వెల్లడించారు.
కర్తార్పుర్ నడవా...
కర్తార్పుర్లో మౌలికవసతుల సదుపాయాలను పెంచేందుకు పాక్వైపు ఓ వంతెనను నిర్మించాల్సి ఉంది. అయితే కరోనా, వర్షాల కారణంగా రవాణా నిలిచిపోయిందని తెలిపిన శ్రీవాస్తవ.. యాత్రికుల సౌకర్యం కోసం పాకిస్థాన్తో సంప్రదింపులు జరుపుతున్నట్టు వెల్లడించారు.
ఇదీ చూడండి:- 'కుల్భూషణ్పై భారత్ డిమాండ్ న్యాయపరంగా అసాధ్యం'
