దక్షిణాసియాలోనే మొట్టమొదటి అంతర్ దేశ చమురు పైప్లైన్ నిర్మించిన ఘనత... భారత్, నేపాల్కు దక్కింది. బిహార్లోని మోతీహరి నుంచి నేపాల్లోని అమ్లేఖ్గంజ్ మధ్య ఏర్పాటుచేసిన 69 కిలోమీటర్లు పొడవైన పైప్లైన్ అందుబాటులోకి వచ్చింది. దిల్లీ నుంచి ప్రధాని నరేంద్రమోదీ, కాఠ్మాండూ నుంచి నేపాల్ ప్రధాని కేపీ శర్మ ఓలీ వీడియో కాన్ఫరెన్స్ ద్వారా ఈ ప్రాజెక్టును కలిసి ప్రారంభించారు.
ఈ పైప్లైన్ రాకతో నేపాల్లో చమురు ధరలు తగ్గుతాయని, పౌరులకు సరసమైన ధరలకే పెట్రోల్ అందుబాటులోకి వస్తుందని పేర్కొన్నారు మోదీ.
"మన సంయుక్త కృషి ఉద్దేశం పౌరులకు లాభం జరగడం, వారు అభివృద్ధి చెందడం. అభివృద్ధి పథకాలు అనుకున్న సమయంలో పూర్తి కావడం మన రెండు ప్రభుత్వాల ప్రాథమిక ప్రాధాన్యాంశం. మోతీహరి-అమ్లేక్ గంజ్ పైప్ లైన్కు గతేడాది భూమి పూజ జరిగింది. దక్షిణాసియాలోనే తొలిసారి ఇరు దేశాలు చేపట్టిన ఒక పైప్లైన్ రికార్డు సమయంలో పూర్తికావడం సంతోషకరమైన విషయం. పూర్తి చేసేందుకు పెట్టుకున్న లక్ష్యంలో సగం సమయంలోనే పూర్తయింది. ఈ పైపులైన్ ద్వారా 2 మిలియన్ టన్నుల శుద్ధ చమురు ఉత్పత్తులు సరసమైన ధరలకు నేపాల్ పౌరులకు అందుతాయి."
-నరేంద్ర మోదీ, ప్రధాన మంత్రి
1973 నుంచి భారత్ ట్యాంకర్ల ద్వారా నేపాల్కు చమురు సరఫరా చేస్తోంది. 1996లో మోతీహరి ఇంధన పైప్లైన్కు ప్రతిపాదన వచ్చింది. 2014లో మోదీ కాఠ్మాండూ పర్యటనలో ఒప్పందంపై కసరత్తు తుదిదశకు చేరుకుంది. 2015లో పైప్లైన్ నిర్మాణానికి ఇరు దేశాలు అంగీకరించాయి. 2015లో నేపాల్లో భూకంపం నేపథ్యంలో నిర్మాణం వాయిదా పడింది. గతేడాది ఏప్రిల్లో పనులు ప్రారంభమయ్యాయి.
ఇదీ చూడండి: 'విక్రమ్' కోసం సర్వశక్తులు ఒడ్డుతున్న ఇస్రో
