చైనాలో చిక్కుకున్న 39 మంది భారతీయ రవాణా నౌకా సిబ్బందికి తక్షణ సాయమందించాలని భారత్ పిలుపునిచ్చింది. ఈ మేరకు చైనాతో ఈ విషయంపై సంప్రదించేందుకు చర్యలు చేపట్టినట్టు భారత విదేశాంగశాఖ వెల్లడించింది. కరోనా సంబంధిత ఆంక్షలతో చైనా అధికారులు 'ఎంవీ జగ్ ఆనంద్', 'ఎంవీ అనస్తాసియా' నౌకలను అక్కడి ఓడరేవుల్లో నిలిపివేశారు. చైనా ప్రభుత్వం అలసత్వం కారణంగా నౌకా సిబ్బంది తీవ్ర ఇబ్బందులను ఎదుర్కొంటున్నారని విదేశాంగ శాఖ తెలిపింది. దీంతో సిబ్బందిని మార్చాలని అక్కడి అధికారులను విజ్ఞప్తి చేయగా.. దానికీ ససేమిరా అంటోంది జిన్పింగ్ సర్కార్.
జింగ్తాంగ్ ఓడరేవులో చిక్కుకున్న 'జగ్ ఆనంద్' నౌకలో 23 మంది, కాఫీడియన్ ఓడరేవులో నిలిపివేసిన 'అనస్తాసియా' నౌకలో మరో 16 మంది.. కొద్ది నెలలుగా చైనాలోనే ఉండిపోయారు. అయితే.. సంబంధిత షిప్పింగ్ కంపెనీల సాయంతో చైనాలోని భారత దౌత్య కార్యాలయం ద్వారా ఈ సమస్యను పరిష్కరించేందుకు కేంద్రం సంప్రదింపులు జరుపుతోందని విదేశాంగ అధికార ప్రతినిధి అనురాగ్ శ్రీవాస్తవ తెలిపారు. ఈ నేపథ్యంలో అక్కడి నౌకా సిబ్బందికి తక్షణమే ఆచరణయోగ్యమైన సహాయ సహకారాలు అందించాలని ఆయన పేర్కొన్నారు.
ఎన్హెచ్ఆర్సీ ఏమందంటే?
ఈ విషయమై షిప్పింగ్ డైరెక్టర్ జనరల్కు జాతీయ మానవ హక్కుల కమిషన్(ఎన్హెచ్ఆర్సీ) నోటీసులు జారీ చేసినట్టు అధికారులు వెల్లడించారు. 146 రోజులపాటు చైనా ఓడరేవులో చిక్కుకున్న భారతీయ నౌకా సిబ్బంది పరిస్థితులపై.. ఎన్హెచ్ఆర్సీ స్వయంగా ఆరాతీసినట్టు ఓ ప్రకటనలో తెలిపింది.
చైనా, ఆస్ట్రేలియా మధ్య విభేదాల కారణంగా.. ఆసీస్ నుంచి సరకు తీసుకెళ్లిన భారతీయ నౌకా సిబ్బంది గతేడాది జూన్ నుంచి అక్కడే ఉండిపోయారంది. చైనా తీరుపై మండిపడిన ఎన్హెచ్ఆర్సీ.. ఆ దేశం మానవ హక్కులను ఉల్లంఘిస్తోందని పేర్కొంది.
ఆస్ట్రేలియా నుంచి జగ్ ఆనంద్ సహా.. మొత్తం 22 నౌకలు బొగ్గును తీసుకుని చైనాకు బయల్దేరాయి. ఈ ఓడల్లో మొత్తం 400కు పైగా మంది సిబ్బంది ఉన్నారు. వాణిజ్యపరమైన విభేదాల కారణంగా ఉభయ దేశాల నడుమ ఘర్షణ వాతావరణం నెలకొంది.
ఇదీ చదవండి: ఆసీస్ జాతీయ గీతంలో మార్పు- కారణమిదే...
