భారత ప్రధాన న్యాయమూర్తి జస్టిస్ రంజన్ గొగొయిపై సుప్రీంకోర్టు మాజీ ఉద్యోగిని చేసిన లైంగిక వేధింపుల ఆరోపణల్లో పస లేదని జస్టిస్ బాబ్డే నేతృత్వంలోని అంతర్గత విచారణ కమిటీ తేల్చింది. ఈ మేరకు నివేదిక రూపొందించింది.
సుప్రీంకోర్టు మాజీ ఉద్యోగిని చేసిన ఆరోపణల్లో ఎంతమాత్రం నిజం లేదని, అవన్నీ నిరాధారమని కమిటీ అభిప్రాయపడింది. ఈ మేరకు సీజేఐకు క్లీన్ చిట్ ఇచ్చింది.
అంతర్గత విచారణ కమిటీ నివేదికలో పొందుపర్చిన అంశాలను బహిర్గతం చేయబోమని సుప్రీంకోర్టు సెక్రటరీ జనరల్‌ కార్యాలయం తెలిపింది. నివేదికను మే 5న జస్టిస్ బాబ్డే తర్వాత సీనియర్‌ న్యాయమూర్తికి కమిటీ సమర్పించినట్లు వెల్లడించింది.
ఇదీ నేపథ్యం...
జస్టిస్ రంజన్ గొగొయిపై సుప్రీంకోర్టు మాజీ ఉద్యోగిని ఒకరు లైంగిక వేధింపుల ఆరోపణలు చేశారని ఏప్రిల్ 20న వెలుగులోకి రావడం కలకలం రేపింది. అదే రోజు జస్టిస్ రంజన్ గొగొయి నేతృత్వంలోని ధర్మాసనం అత్యవసరంగా భేటీ అయింది.
సీజేఐపై ఆరోపణలను సుప్రీంకోర్టు తీవ్రంగా పరిగణించింది. జస్టిస్ ఎస్ఏ బాబ్డే నేతృత్వంలో అంతర్గత విచారణకు ఆదేశించింది. ఈ కమిటీలో జస్టిస్‌ఇందూ మల్హోత్రా, జస్టిస్‌ఇందిరా బెనర్జీ సభ్యులు.
ఆరోపణలు చేసిన మహిళ అంతర్గత విచారణ కమిటీ ముందు ఓసారి హాజరయ్యారు. తర్వాత... విచారణకు హాజరుకాబోనని ప్రకటించారు.
చివరకు... సీజేఐపై వచ్చిన ఆరోపణల్లో ఎలాంటి నిజం లేదని జస్టిస్ ఎస్ఏ బాబ్డే నేతృత్వంలోని కమిటీ తేల్చింది.
కుట్ర కోణం...
సీజేఐపై ఆరోపణల వెనుక పెద్ద కుట్ర ఉందన్న కేసుపై సుప్రీంకోర్టులో విచారణ జరుగుతోంది.
- ఇదీ చూడండి: 'బాక్సర్' మోదీపై రాహుల్ 'రాజకీయ పంచ్'
