గాంధీనగర్.. గుజరాత్లోని ఈ లోక్సభ స్థానం భారతీయ జనతా పార్టీ కంచుకోట. అగ్రనేత లాల్ కృష్ణ అడ్వాణీ సిట్టింగ్ ఎంపీ. ఈ సార్వత్రిక ఎన్నికల వేళ లెక్క మారింది. 6 సార్లు గెలిచిన అడ్వాణీ స్థానంలో స్వయంగా భాజపా అధ్యక్షుడు అమిత్షా బరిలో దిగారు. ఆయన్ను ఎదుర్కొని కాంగ్రెస్ విజేతగా నిలవగలదా అన్నదే ప్రశ్న.
గాంధీనగర్లో మొత్తం ఓటర్ల సంఖ్య- 19.21లక్షలు. గుజరాత్లోని మొత్తం 26 లోక్సభ సీట్లలో అత్యధిక సంఖ్యలో ఓటర్లున్నది గాంధీనగర్లోనే.
1991-2014 మధ్య జరిగిన ఎన్నికల్లో 1996 మినహా అన్నింటిలో అగ్రనేత అడ్వాణీ విజయం సాధించారు. 1996లో మాత్రం ఆయన స్థానంలో అటల్ బిహారీ వాజ్పేయీ పోటీ చేసి గెలిచారు.
గాంధీ నగర్ పరిధిలో మొత్తం ఏడు శాసనసభ నియోజకవర్గాలున్నాయి. 2017 శాసనసభ ఎన్నికల్లో 5 అర్బన్ స్థానాలు భాజపావే. పాక్షిక గ్రామీణ నియోజకవర్గాలైన ఉత్తర గాంధీనగర్, కాలాల్లను కాంగ్రెస్ కైవసం చేసుకుంది.
అగ్రనేత స్థానంలో అధినేత...
గాంధీనగర్కు వాజ్పేయీ, అడ్వాణీ స్థానికేతరులు. అమిత్షా ఇదే ప్రాంతానికి చెందినవారు. గతంలో షా గాంధీనగర్ లోక్సభ నియోజకవర్గం పరిధిలోని అసెంబ్లీ స్థానాలైన సర్ఖేజ్ ఎమ్మెల్యేగా నాలుగుసార్లు, నారన్పుర ఎమ్మెల్యేగా ఒకసారి గెలుపొందారు. అడ్వాణీ గాంధీనగర్లో పోటీచేసినప్పుడు అమిత్షా 2009లో గాంధీనగర్ లోక్సభ నియోజకవర్గ బాధ్యుడిగా పనిచేశారు. ఇవన్నీ అమిత్కు సానుకూలాంశాలే.
"కాంగ్రెస్ ఇక్కడ పెద్ద విషయమే కాదు. ఇది భాజపా కంచుకోట. మేం అభివృద్ధి, సంక్షేమం రెండూ కల్పిస్తామని ప్రజలకు తెలుసు. ఇప్పటికే మేం చాలా అభివృద్ధి చేసి చూపించాం. ఇక్కడ కాంగ్రెస్కు అభ్యర్థిని ఖరారు చేయకముందే ఓటమి ఖరారైంది. గాంధీనగర్లో భాజపా అభ్యర్థి ఎవరైనా కచ్చితంగా గెలుస్తారు."
-భరత్ పాండ్య, భాజపా అధికార ప్రతినిధి
విజయం కోసం అలుపెరగని పోరు...
గాంధీనగర్లో విజయం కోసం పట్టువదలని విక్రమార్కుడిలా ప్రయత్నిస్తోంది కాంగ్రెస్. 1996లో వాజ్పేయీ రాజీనామాతో వచ్చిన ఉపఎన్నికల్లో ప్రముఖ నటుడు రాజేశ్ ఖన్నాను పోటీకి నిలిపింది. 1998 ఎన్నికల్లో గుజరాత్ మాజీ డీజీపీ పీకే దత్తాకు టికెట్ ఇచ్చింది. 1999లో ఎన్నికల సంఘం మాజీ ప్రధానాధికారి టీఎన్ శేషన్ను రంగంలోకి దింపింది. ఏ ఒక్క ప్రయత్నమూ ఫలించలేదు.
అడ్వాణీ స్థానంలో అమిత్ షా రాకతో కాంగ్రెస్ కొత్త లెక్కలు వేసుకుంది. గాంధీనగర్లో బలమైన అభ్యర్థిని నిలబెడితే భాజపా అధ్యక్షుడికి గట్టి పోటీ ఇవ్వవచ్చన్న రాజకీయ విశ్లేషకుల మాట కాంగ్రెస్ను ఆలోచింపచేసింది. అందుకే అభ్యర్థి ఎంపికపై విస్తృత కసరత్తు చేసింది. పాటీదార్ ఉద్యమనేత హార్దిక్ పటేల్ను రంగంలోకి దింపడంపైనా తర్జనభర్జన పడింది. ఆయన్ను పోటీకి నిలిపితే... 2017 శాసనసభ ఎన్నికల్లో భాజపాకు పడిన పటేళ్ల ఓట్లు ఈసారి తమకు మళ్లుతాయని ఆశపడింది. కానీ సాధ్యపడలేదు. ఓ కేసులో దోషిగా తేలిన హార్దిక్... పోటీకి అనర్హుడయ్యారు.
పటేల్ కాదు ఠాకూర్...
అమిత్షాను ఎదుర్కొనేందుకు ఉత్తర గాంధీనగర్ ఎమ్మెల్యే సీజే చావ్డాను రంగంలోకి దింపింది కాంగ్రెస్. ఆయన స్థానికుడు, రెండు సార్లు శాసనసభ్యుడు, ఠాకూర్ వర్గం నేత. ఆ సామాజిక వర్గం మద్దతు ఎప్పుడూ కాంగ్రెస్కే.
ఎన్నికల వ్యూహాల్లో ఆరితేరిన అమిత్షాను చావ్డా ఎదుర్కోగలరా అన్నదే అసలు ప్రశ్న.
"ఈ పోటీ చావ్డాకు, అమిత్షాకు మధ్య అనొద్దు. ఈ ఎన్నికలు కాంగ్రెస్, భాజపా మధ్య పోటీ. అమిత్ షా భాజపా అధ్యక్షుడిగా ఉండి సురక్షిత స్థానాన్ని ఎందుకు ఎంచుకున్నారు? గట్టి సవాలు ఎదురయ్యే చోట నిలబడాల్సింది కదా. ఇటీవలే కాంగ్రెస్ ముఖ్య నేతలు గాంధీనగర్లో చేసిన మెగా ర్యాలీలో ప్రజలు మాకు బ్రహ్మరథం పట్టారు. లక్షలాది మంది హాజరయ్యారు. దాన్ని బట్టే తెలుస్తోంది భాజపాకు గుజరాత్లో విజయం అనుకున్నంత సులువుగా లేదని. భాజపాకు మేం గట్టి పోటీనిస్తాం."
-సీజే చావ్డా, గాంధీనగర్ కాంగ్రెస్ అభ్యర్థి
అడ్వాణీ విజయపరంపరను అమిత్షా కొనసాగిస్తారా? సీజే చావ్డా సరికొత్త చరిత్ర లిఖిస్తారా అనేది మే 23న తేలనుంది.
ఇదీ చూడండి: భారత్ భేరి: 'యావద్దేశం మోదీ మంత్రం'
