ఐఏఎస్, ఐపీఎస్, ఐఎఫ్ఎస్ తరహాలో... ఇండియన్ మెడికల్ సర్వీస్ (ఐఎంఎస్)ను ఏర్పాటు చేయాలని ఇండియన్ మెడికల్ అసోసియేషన్ (ఐఎంఏ) డిమాండ్ చేసింది. ఆరోగ్య సంరక్షణ రంగంలో సమూల మార్పులు తీసుకొచ్చేందుకు ఇది అత్యవసరమని పేర్కొంది.
"ఆరోగ్య రంగంలో సమూల మార్పులు అవసరమని ఐఎంఏ భావిస్తోంది. ఇందుకోసం ఐఏఎస్, ఐపీఎస్, ఐఎఫ్ఎస్ కేడర్ల తరహాలో ఇండియన్ మెడికల్ సర్వీస్ ఏర్పాటు చేయాలని డిమాండ్ చేస్తోంది."
- ఐఎంఏ వైద్యుల సంఘం
మోయలేని భారం
'కేంద్ర ఆరోగ్య మంత్రిత్వశాఖతో సహా రాష్ట్ర ఆరోగ్య విభాగాలకు చెందిన కార్యదర్శుల నుంచి, వివిధ వ్యాధుల నియంత్రణ కార్యక్రమాల ప్రాజెక్టు ఆఫీసర్లు, వివిధ విభాగాలకు చెందిన అధికారులు, జిల్లా వైద్యాధికారులు... ఇలా అందరూ ఐఎంఏ పరిధిలోకి వస్తారు. వీరి బాధ్యత అంతా ఐఎంఏ ఒక్కటే చూసుకోవాలి'
- డాక్టర్ రాజన్ శర్మ, ఐఎంఏ జాతీయ అధ్యక్షుడు
అందువల్ల ఇండియన్ మెడికల్ సర్వీస్ అధికారులను నియమించడం ఎంతో అవసరమని ఆయన పేర్కొన్నారు.
కనీసం ఎంబీబీఎస్
ఇండియన్ మెడికల్ సర్వీస్ పరీక్ష రాసే అభ్యర్థులు కనీసం ఎంబీబీఎస్ అర్హత కలిగి ఉండాలని డాక్టర్ రాజన్ సూచించారు.
నాన్ కోవిడ్ పాలసీ
కరోనా అంటువ్యాధికే కాకుండా... మిగతా రోగాలకు కూడా సమాన ప్రాధాన్యం ఇస్తూ... పోస్టు కొవిడ్ ఆరోగ్య సంరక్షణ విధానం తీసుకురావడం అత్యవసరమని డాక్టర్ రాజన్ స్పష్టం చేశారు. సరైన మౌలిక సదుపాయాలు, వ్యూహాలు ఉంటే.. కరోనా మహమ్మారిని మరింత సమర్థవంతంగా ఎదుర్కోవడానికి వీలవుతుందని ఆయన అన్నారు.
ఆరోగ్య రంగానికి జీడీపీలో 5 శాతం!
కేంద్ర ప్రభుత్వం జీడీపీలో 5 శాతాన్ని ఆరోగ్య రంగానికి కేటాయించాల్సిన అవసరముందని ఐఎంఏ సెక్రటరీ జనరల్ డాక్టర్ ఆర్.వీ. అశోకన్ పేర్కొన్నారు. అలాగే 'ఒకే దేశం- ఒకే ఆరోగ్య మార్గదర్శకాలు' కూడా తీసుకురావాలని ఆయన డిమాండ్ చేశారు.
ఇదీ చూడండి: ఎస్బీఐ డూప్లి'కేటు' బ్రాంచ్.. అవాక్కయిన అధికారులు
