'ఎల్​జేపీని మహాకూటమిలో చేర్చుకునేందుకు సై'

ఎన్డీఏతో తెగదెంపులు చేసుకుని బిహార్ ఎన్నికల్లో ఒంటరిగా పోటీ చేస్తున్న ఎల్​జేపీని మహాకూటమిలో చేర్చుకునేందుకు సిద్ధమని తెలిపారు ఆర్జేడీ నేత తేజస్వీ యాదవ్​. జాముయ్​లో ర్యాలీలో పాల్గొన్న అనంతరం ఈటీవీ భారత్​కు ప్రత్యేకంగా ఈ విషయాన్ని వెల్లడించారు.

బిహార్ ప్రజలంతా తమవైపే ఉన్నారని చెప్పారు ఆర్జేడీ నేత, మహాకూటమి సీఎం అభ్యర్థి తేజస్వీ యాదవ్​. రానున్న అసెంబ్లీ ఎన్నికల్లో తమదే విజయమని ధీమా వ్యక్తం చేశారు.

జాముయ్​లో నిర్వహించిన ర్యాలీలో పాల్గొన్న అనంతరం ఈటీవీ భారత్​తో ప్రత్యేకంగా మాట్లాడారు తేజస్వీ. ప్రజల మద్దతుతో ప్రభుత్వాన్ని ఏర్పాటు చేయబోతున్నామన్నారు. అవసరమైతే ఎల్​జేపీ అధ్యక్షుడు చిరాగ్​ పాసవాన్​ను కూటమిలో చేర్చుకునేందుకు కూడా సిద్ధమని తేజస్వీ కీలక వ్యాఖ్యలు చేశారు.

భాజపా బీ-టీమ్​..

బిహార్ ఎన్నికల్లో ఒంటరిగా పోటీ చేస్తున్న ఎల్​జేపీని భాజపా బీ-టీమ్​గా అభివర్ణించారు తేజస్వీ. పార్టీ పేరును ప్రస్తావించకుండా పరోక్షంగా ఈ వ్యాఖ్యలు చేశారు. ఓట్లు చీల్చేందుకు భాజపానే ఈ వ్యూహం రూపొందించినట్లు చెప్పారు. ఈ విషయంపై ప్రజలు అప్రమత్తంగా ఉండాలని మొకమా, షేక్​పుర, జూముయ్, నవాదా ర్యాలీల్లో సూచించారు.

బిహార్ అసెంబ్లీ ఎన్నికలు మూడో విడతల్లో అక్టోబర్​ 28, నవంబర్ 3, నవంబర్ 7న జరగనున్నాయి. 10న ఫలితాలు వెలువడుతాయి.