పుల్వామా తరహా ఉగ్రకుట్ర సూత్రధారి గుర్తింపు

కశ్మీర్​లో పుల్వామా దాడి తరహా ఉగ్రకుట్ర సూత్రధారిని గుర్తించారు పోలీసులు. తీవ్రవాది.. హిజ్​బుల్ ముజాహిదీన్​కు చెందిన హిదయతుల్లా మాలిక్​గా గుర్తించారు. గతేడాది అతడు ఉగ్రసంస్థలో చేరినట్లు తేల్చారు.​

జమ్ముకశ్మీర్‌లో పుల్వామా తరహా ఉగ్రదాడి కుట్రను భగ్నం చేసిన పోలీసులు ఒక్క రోజు వ్యవధిలోనే ఈ ఘటన సూత్రధారిని గుర్తించారు. పుల్వామాలో పేలుడు పదార్ధాలు అమర్చిన కారును గురువారం స్వాధీనం చేసుకుని ఎవరికీ ప్రమాదం జరగకుండా దాన్ని పేల్చివేశారు పోలీసులు. ఈ వాహనం హిదయతుల్లా మాలిక్‌ది అని గుర్తించారు.

షోపియాన్‌ వాసి అయిన హిదయతుల్లా గత సంవత్సరం హిజ్‌బుల్ ముజాహిద్దీన్‌లో చేరినట్లు తేల్చారు. ఈ కేసు దర్యాప్తును జమ్ముకశ్మీర్ పోలీసులు కొనసాగిస్తున్నారు.

ఇదీ చూడండి: పుల్వామాలో భారీ ఉగ్రదాడికి కుట్ర..!