క్షయ వ్యాధి నివారణకు వినియోగించే టీకా.. కరోనా నియంత్రణకు ఏ మేరకు ఉపయోగపడుతుందనే అంశంపై పరిశోధన జరపనున్నట్టు ఐసీఎంఆర్(భారత వైద్య పరిశోధన మండలి) తెలిపింది. అయితే కచ్చితమైన ఫలితాలు వెలువడేంత వరకు ఈ వ్యాక్సిన్ను వైరస్ చికిత్సకు సిఫార్సు చేయబోమని స్పష్టం చేసింది.
బాసిలస్ కాల్మెటే- గురిన్(బీసీజీ) అనే వ్యాక్సిన్ను క్షయ వ్యాధి నివారణకు వినియోగిస్తారు. మనిషి పుట్టిన వెంటనే ఈ బీసీజీ వ్యాక్సిన్ను అందిస్తారు. అయితే దీని వల్ల క్షయ సోకదు అని కచ్చితంగా చెప్పలేకపోయినా.. కొంతమేర వరకు రక్షణ కల్పిస్తుంది.
వైరస్ చికిత్సకు ఈ వ్యాక్సిన్ ఉపయోగపడుతుందా? లేదా? అనే అంశంపై వచ్చే వారం నుంచి పరిశోధన జరపనున్నట్టు ఐసీఎంఆర్ తెలిపింది. అయితే ఈ వ్యాక్సిన్తో లాభాలు తక్కువనే అంటున్నారు ఐసీఎంఆర్లోని ఎపిడెమియోలజీ అండ్ కమ్యూనికబుల్ డిసీజెస్ విభాగ అధిపతి డా. గంగాఖేద్కర్.
"కరోనా విషయంలో బీసీజీ పని చేసే అవకాశాలు తక్కువే. ఎందుకంటే బీసీజీ 15ఏళ్లు మాత్రమే రక్షణ కల్పిస్తుంది. తిరిగి వ్యాక్సిన్ను యుక్తవయసులోనే వేయాలి. అందుకే 70ఏళ్ల కరోనా రోగిపై ఇది పనిచేయదు. అదే సమయంలో 15ఏళ్ల తర్వాత వ్యాక్సిన్ తిరిగి తీసుకున్నా.. వైరస్ బారిన పడరని చెప్పడానికి సరైన ఆధారాలు లేవు."
- డా. గంగాఖేద్కర్, ఎపిడెమియోలజీ అండ్ కమ్యూనికబుల్ డిసీజెస్ హెడ్
ఇదీ చూడండి:- రూ.600తో 20 నిమిషాల్లోపే కరోనా పరీక్ష ఫలితాలు
