కరోనా మహమ్మారికి కేంద్ర బిందువైన చైనా తర్వాత ఇరాన్లో ఈ వైరస్ వేగంగా విస్తరిస్తోంది. ఇప్పటికే 237 మంది ప్రాణాలు కోల్పోయారు. ఇరాన్లో 7వేల మందికిపైగా వైరస్ బారినపడిన నేపథ్యంలో అక్కడ చిక్కుకున్న భారతీయులను స్వదేశానికి తీసుకొచ్చేందుకు చర్యలు చేపట్టింది కేంద్ర ప్రభుత్వం. వారి కోసం వైమానిక దళానికి చెందిన సీ-17 గ్లోబ్మాస్టర్ మిలిటరీ విమానం ఉత్తర్ప్రదేశ్లోని హిందోన్ ఎయిర్బేస్ నుంచి బయలుదేరి వెళ్లింది.
మంగళవారం ఉదయానికి భారత్కు..
సోమవారం రాత్రి 8:30 గంటల ప్రాంతంలో హిందోన్ ఎయిర్బేస్ నుంచి బయలుదేరిన వైమానిక దళ విమానం సీ-17 మంగళవారం తెల్లవారుజామున 2 గంటలకు ఇరాన్లోని టెహ్రాన్ చేరుకుంటుంది. భారతీయులను తీసుకుని ఉదయం 4:30 గంటల ప్రాంతలో భారత్కు పయనమవుతుంది. మంగళవారం ఉదయం 9:30 గంటలకు హిందోన్ ఎయిర్బేస్కు చేరుతుంది. ఇరాన్ నుంచి వచ్చేవారి కోసం హిందోన్లో ప్రత్యేక నిర్బంధ కేంద్రాలు ఏర్పాటు చేశారు అధికారులు.
2వేల మంది..
ఇరాన్లో సుమారు 2,000 మంది భారతీయులు ఉన్నట్లు అంచనా. వారందరినీ తరలించేందుకు ప్రణాళిక చేస్తున్నారు అధికారులు.
300 మంది నమూనాలు..
మూడు రోజుల క్రితం ఇరాన్లోని సుమారు 300 మంది భారతీయుల రక్త నమూనాలను భారత్కు తీసుకొచ్చింది మహాన్ ఎయిర్లైన్ విమానం.
సీ-17 గ్లోబ్మాస్టర్ ద్వారా..
గడిచిన రెండు వారాల్లోపు సీ-17 గ్లోబ్మాస్టర్ విమానం ద్వారా భారతీయులను తరలించటం ఇది రెండోసారి. గత నెల ఫిబ్రవరి 27న చైనాలోని వుహాన్ నుంచి 76 మంది భారతీయులు, 36 మంది విదేశీయులను ఈ విమానంలోనే భారత్కు తరలించారు. చైనాకు వైద్య సామగ్రిని తరలించేందుకూ సీ-17 విమానాన్నే వినియోగించారు.
ఇదీ చూడండి: భారత్లో 45కు పెరిగిన కరోనా కేసుల సంఖ్య
