మాస్టారు సంకల్పం ముందు వైకల్యం చిన్నబోయింది!

ఆ సారు పాఠాలు చెబితే విద్యార్థులంతా ముగ్ధులై వినాల్సిందే. ఆయన బోర్డుపై గీసే బొమ్మల వల్ల పాఠాలన్నీ ఇట్టే అర్థమైపోతాయి. ఆయన పని చేసే ఆ సర్కారు ప్రాథమిక పాఠశాల నిండా ఆయన గీసిన కళాఖండాలే. ఆడుతూ పాడుతూ విద్య నేర్పే ఆయనంటే విద్యార్థులకు ఎంతో ఇష్టం. కానీ నిండు మనసున్న ఆ ప్రతిభావంతుడు ఓ దివ్యాంగుడు!

మధ్యప్రదేశ్​ డిండోరీలోని సహజ్​పుర్​ గ్రామానికి చెందిన భగవాన్​ దీన్​ చేతి వేళ్లు సరిగ్గా లేకపోయినా, అద్భుతమైన బొమ్మలు గీసి విద్యార్థులకు అర్థమయ్యేలా పాఠాలు చెబుతున్నాడు.

దీన్​ పుట్టుక నుంచే దివ్యాంగుడు కాదు. ఆర్థరైటిస్ బారిన పడి రెండు చేతులు, ఒక కాలి వేళ్లు వంకరపోయాయి. అయినా ఆత్మస్థైర్యం కోల్పోకుండా వంకర వేళ్లతోనే తనకెంతో ఇష్టమైన బొమ్మలు వేయడంపై పట్టు సాధించాడు. ఉపాధి కోసం గ్రామంలోని ప్రభుత్వ ప్రాథమిక పాఠశాలలో అతిథి ఉపాధ్యాయుడిగా చేరాడు. వినూత్న బోధనా శైలితో తక్కువ సమయంలోనే విద్యార్థులకు దగ్గరయ్యాడు.

"ఆడుతూ పాడుతూ బోధిస్తే పిల్లలు భయం లేకుండా చదువుతారు. అలా చెప్పడం వల్ల వారికి బాగా అర్థమవుతుంది. వారికి బోర్​ కొట్టినప్పుడు కథలు చెప్పడం, వాటికి సంబంధించిన బొమ్మలు గీసి చూపడం చేయాలి. అలా చేస్తే వారు సాయంత్రం 4,5 గంటలైనా ఇంటికి కూడా వెళ్లాలనుకోరు."

-భగవాన్​ దీన్​, దివ్యాంగ ఉపాధ్యాయుడు.

దీన్​ చేతుల్లో అందమైన కళ ఉంది. కళను ఆయుధంగా చేసుకుని బడి గోడల నిండా ఆయన వేసిన బొమ్మలను అతికించి విద్యార్థులకు సోదాహరణంగా పాఠాలు నేర్పుతున్నాడు. తన అంగవైకల్యం ఉపాధ్యాయ వృత్తికి ఎన్నడూ అడ్డురాలేదు. అంతే కాదు, ఎవరిపై ఆధారపడకుండా ఇంటి పనులు కూడా తానే సునాయాసంగా చేసుకుంటాడు.

దృఢమైన మనోబలం ఉంటే శారీరక బలహీనతలు విజయాన్ని అడ్డుకోలేవని నిరూపించాడు ఈ ఆదర్శ బడిపంతులు.

ఇదీ చూడండి:అనుకోకుండా వచ్చి ఉన్నత శిఖరాలకు చేరి..