కరోనా మహమ్మారి కట్టడికి త్వరలోనే వ్యాక్సిన్ అందుబాటులోకి రానున్న క్రమంలో పంపిణీకి సన్నద్ధమవుతోంది కేంద్రం. ఈ మేరకు దేశవ్యాప్తంగా టీకా పంపిణీపై రాష్ట్ర, కేంద్ర పాలిత ప్రాంతాల ప్రభుత్వాలకు మార్గదర్శకాలు జారీ చేసింది. డిజిటల్ ప్లాట్ఫాం కొవిడ్ వాక్సిన్ ఇంటెలిజెన్స్ నెట్వర్క్ (కో-విన్) ద్వారా లబ్ధిదారులు, టీకాల వివరాలను రియల్ టైమ్లో ట్రాక్ చేయనున్నారు.
- ప్రతి సెషన్లో 100-200 మందికి టీకా వేయాలి.
- వ్యాక్సిన్ తీసుకున్న తర్వాత ఏమైనా ప్రతికూల ప్రభావం ఉందా అని తెలుసుకునేందుకు 30 నిమిషాల పాటు పరిశీలనలో ఉంచాలి. ఒక్కోసారి ఒక్కరిని మాత్రమే టీకా తీసుకునేందుకు అనుమతించాలి.
- టీకా పంపిణీ కేంద్రాల్లో ముందస్తుగా నమోదు చేసుకున్న లబ్ధిదారులకే ప్రాధాన్య క్రమంగా టీకా అందించాలి.
- మొదట ఆరోగ్య సిబ్బంది, ఆ తర్వాత 50 ఏళ్లు పైబడిన వారికి ప్రాధాన్యం ఇవ్వాలి.
- వివిధ రకాల వ్యాక్సిన్లతో గందరగోళం ఏర్పడకుండా నివారించేందుకు ఒక జిల్లాకు ఒకే సంస్థ టీకాను కేటాయించాలి.
- వ్యాక్సిన్ క్యారియర్లు, నిలువ చేసే బాక్సులు, ఐస్ ప్యాక్లు నేరుగా సూర్యరశ్మి తలగకుండా జాగ్రత్తలు తీసుకోవాలి.
- లబ్ధిదారుడు టీకా తీసుకునేందుకు కేంద్రానికి వచ్చే వరకు వ్యాక్సిన్ను క్యారియర్లోపలే ఉంచాలి.
- కొవిడ్ టీకా లేబుల్పై వ్యాక్సిన్ వైయల్ మానిటర్లు(వీవీఎం), గడువు ముగిసే తేదీ ఉండకపోయినా.. అలాంటి వాటిని వినియోగించకుండా పక్కన పెట్టకూడదు. టీకా పంపిణీ ముగిసిన తర్వాత అన్ని ఐస్ ప్యాక్లు, తెరవని వ్యాక్సిన్ బాక్సులను తిరిగి కోల్డ్ చైన్ పాయింట్కు పంపించాలి.
- వ్యాక్సినేషన్ గురించి ప్రజల్లో నెలకొన్న భయాలను తొలగించేందుకు రాష్ట్ర ప్రభుత్వాలు చర్యలు తీసుకోవాలి.
మొదటి విడతలో భాగంగా దేశంలో దాదాపు 30 కోట్ల మందికి కరోనా టీకా వేయాలని కేంద్రం ప్రణాళికలు రచిస్తోంది. ఈ నేపథ్యంలో అనుసరించాల్సిన విధివిధానాలను రాష్ట్ర ప్రభుత్వాలకు జారీ చేసింది.
ఇదీ చూడండి: రూ.24 లక్షల నీటి బిల్లు బాకీపడ్డ సీఎం, మంత్రులు
