కేరళలో రాజకీయ ప్రకంపనలు సృష్టించిన బంగారం స్మగ్లింగ్ కేసులో ప్రభుత్వంపై ఒత్తిడి పెంచేందుకు అన్ని విధాలా ప్రయత్నిస్తోంది కాంగ్రెస్ నేతృత్వంలోని యునైటెడ్ డెమొక్రటిక్ ఫ్రంట్. స్మగ్లింగ్కు ముఖ్యమంత్రి కార్యాలయానికి లింకు ఉండటం వల్ల సీఎం పినరయి విజయన్ రాజీనామా చేయాలని డిమాండ్ చేస్తోంది. ఈ మేరకు సర్కారుపై అవిశ్వాస తీర్మానం పెట్టాలని నిర్ణయించింది యూడీఎఫ్.
రాష్ట్ర అసెంబ్లీ స్పీకర్ శ్రీరామక్రష్ణన్ రాజీనామాను కోరుతూ.. ఆయనకు వ్యతిరేకంగా తీర్మానం ప్రవేశపెట్టేందుకూ నిర్ణయించినట్లు యూడీఎఫ్ కన్వీనర్ బెన్ని బెహనన్ తెలిపారు.
" ప్రభుత్వానికి వ్యతిరేకంగా అవిశ్వాస తీర్మానం సహా స్పీకర్కు వ్యతిరేకంగా తీర్మానం ప్రవేశపెట్టాలని ఈ రోజు యూడీఎఫ్ సమావేశంలో నిర్ణయం తీసుకున్నాం. ఈ అంశాన్ని ప్రతిపక్ష కాంగ్రెస్ నేత రమేశ్ చెన్నితలకు అప్పగించింది కూటమి. స్మగ్లింగ్ కేసులో స్పీకర్కు సంబంధాలు ఉన్నందున ఆయన రాజీనామా చేసితీరాల్సిందే. ముఖ్యమంత్రి రాజీనామా కోసం మా పోరాటాన్ని కొనసాగిస్తాం. నిందితులను రక్షించే ప్రయత్నాలు జరిగినట్లు ఇప్పడు నిర్ధరణ అయింది. సీఎం మాజీ కార్యదర్శి, మాజీ ఐటీ కార్యదర్శికి ఓ నిందితుడితో సంబంధాలు ఉన్నట్లు స్పష్టమయింది."
- బెన్ని బెహనన్, యూడీఎఫ్ కన్వీనర్
బంగారం స్మగ్లింగ్ కేసులో కీలకమైన ఇద్దరు నిందితులు స్వప్న సురేశ్, సందీప్ నాయర్లకు రిమాండ్ విధించింది కొచ్చిలోని జాతీయ దర్యాప్తు సంస్థ (ఎన్ఐఏ) కోర్టు. వారి అరెస్ట్ తర్వాత రాష్ట్రంలో రాజకీయ దుమారం చెలరేగింది. పినరయి విజయన్ నేతృత్వంలోని ఎల్డీఎఫ్ లక్ష్యంగా ప్రతిపక్షం విమర్శలు చేస్తుంది.
ఇదీ చూడండి: బంగారం స్మగ్లింగ్ కుంభకోణంలో మరో మలుపు
