పాఠశాలల పరిసర ప్రాంతాల్లో 50 మీటర్ల దూరం వరకు ఆరోగ్యానికి హాని కలిగించే ఆహార పదార్థాలు(జంక్ ఫుడ్), వాటి ప్రకటనలపై ఆంక్షలు విధించేందుకు భారత ఆహార భద్రత, నాణ్యత ప్రాధికార సంస్థ(ఎఫ్ఎస్ఎస్ఏఐ) ప్రతిపాదనలు తీసుకొచ్చింది.
పాఠశాల విద్యార్థుల పరిపూర్ణ ఆరోగ్య సంరక్షణకు ఈ ప్రతిపాదనలు తెచ్చినట్లు "ఎఫ్ఎస్ఎస్ఏఐ" సీఈఓ పవన్ కుమార్ అగర్వాల్ తెలిపారు. పాఠశాల పరిసరాల్లో అందుబాటులో ఉండాల్సిన సురక్షిత పోషకాహారం జాబితాపై ఓ ముసాయిదాను రూపొందించి, తుది అనుమతి కోసం ఆరోగ్య మంత్రిత్వ శాఖకు పంపినట్లు ఆయన పేర్కొన్నారు. పాఠశాల చిన్నారుల ఆరోగ్య భద్రతపై పరిశ్రమల సమాఖ్య అసోచామ్ నిర్వహించిన ఓ కార్యక్రమంలో ఆయన ఈ విషయాలు వెల్లడించారు.
పాఠశాల చిన్నారులు తీసుకునే ఆహారంపై నిబంధనలు తీసుకురావాలని ఆహార నియంత్రణ సంస్థకు 2015లో దిల్లీ హైకోర్టు సూచించడం గమనార్హం.
"మూడేళ్ల క్రితమే పాఠశాల చిన్నారులకు ఆహర నియంత్రణ ముసాయిదా తీసుకురావాలని కోర్టు సూచించింది. మేము దానిపై కసరత్తు చేసి ముసాయిదా రూపొందించాం. అది చట్ట రూపం దాల్చితే ఆచరణలోకి తీసుకురావడం సాధ్యమవుతుంది." ---పవన్ కుమార్ అగర్వాల్, ఎఫ్ఎస్ఎస్ఏఐ సీఈఓ
గతఏడాది ప్రజాభిప్రాయ సేకరణ
ఆహార నియంత్రణ ముసాయిదాపై గత ఏడాది ప్రజాభిప్రాయ సేకరణ జరిపింది ఎఫ్ఎస్ఎస్ఏఐ. నూడుల్స్, చిప్స్తోపాటు ఇతర జంక్ ఫుడ్, పానియాలను పాఠశాలకు దగ్గర్లో విక్రయించరాదనే ప్రతిపాదలను అందులో ఉంచింది. ప్రజాభిప్రాయ సేకరణ తర్వాత పూర్తి ముసాయిదాను రూపొందించింది ఆహార నియంత్రణ సంస్థ.
ఇదీ చూడండి: క్రికెట్ ప్రపంచకప్ ఫైనల్పై 'పిచాయ్ జోస్యం'
