'ఆయుష్మాన్ భారత్' పేరిట నకిలీ వెబ్సైట్ను నిర్వహిస్తోన్న నలుగురు దిల్లీ యువకుల్ని అరెస్ట్ చేశారు పోలీసులు. నకిలీ వెబ్సైట్ ద్వారా వేల మందిని మోసగించారని పోలీసు అధికారులు తెలిపారు. నిందితులు.. ఉమేశ్(37), రాజత్(33), గౌరవ్(26), సీమా రాణి శర్మ(33)ల నుంచి ఒక ల్యాప్టాప్, నాలుగు చరవాణిలు, ఎటీఎం కార్డులను స్వాధీనం చేసుకున్నారు పోలీసులు.
ఎలా చేశారు..?
ఆయుష్మాన్ ఆరోగ్య పథకం కింద.. సుమారు 5,000 కొలువులు అందుబాటులో ఉన్నాయని నిందితులు తమ వెబ్సైట్లో ప్రకటన ఇచ్చారు. ఇందులో వార్డ్బాయ్, నర్స్, ల్యాబ్ సహాయకులు, ఫార్మాసిస్ట్ వంటి పోస్టులు ఉన్నాయని నమ్మబలికారు.
సంబంధిత పోస్టుకు అనుగుణంగా ఓ రిజిస్ట్రేషన్ ఫారమ్ను ఆ వెబ్సైట్లో పొందుపరిచారు. ఈ అప్లికేషన్ ఫారమ్ నింపాక.. ఆన్లైన్ పేమెంట్ కింద రూ. 300 నుంచి 500 వరకు (పోస్టును బట్టి) దరఖాస్తుదారులు చెల్లించేలా చేశారు. వీరు చేసిన ఈ మోసాలకు సుమారు 4,200 మందికి పైగా బాధితులు బలయ్యారు.
ట్రస్ట్తో మొదలై వెబ్సైట్ వరకు..
పీఎంజేఎవై స్కీమ్ పేరుతో మోసాలు జరుగుతున్నట్లు ఎన్హెచ్ఏ విభాగానికి ఫిర్యాదులు వచ్చాయి. ఈ నేపథ్యంలో 'జాతీయ ఆరోగ్య ప్రాధికారిక సంస్థ(ఎన్హెచ్ఏ)', 'ఆయుష్మాన్ భారత్- ప్రధాన్ మంత్రి జన్ ఆరోగ్య యోజన'లు.. మే 26 న దిల్లీ సైబర్ క్రైమ్ విభాగానికి ఫిర్యాదు చేశాయి. కేసు నమోదు చేసుకున్న పోలీసులు దర్యాప్తు చేశారు.
తొలుత ఆయుష్మాన్ యోజన ట్రస్ట్ను ఏర్పాటు చేసిన నిందితులు.. తర్వాత దాన్ని నకిలీ ప్రభుత్వ వెబ్సైట్గా మార్చారని పోలీసుల దర్యాప్తులో వెల్లడైంది. ఈ వెబ్సైట్ ద్వారా 6 రాష్ట్రాల్లో (ఉత్తర్ప్రదేశ్, మధ్యప్రదేశ్, రాజస్థాన్, హరియాణ, దిల్లీ, బిహార్) 5,116 వ్యాక్సిన్లపై ప్రకటనలు కూడా వచ్చాయని పోలీసులు పేర్కొన్నారు. ఈ కేసులో భాగస్వామ్యమైన మరికొందరు నిందితుల గురించి ఆరా తీస్తున్నారు పోలీసులు.
ఇదీ చదవండి: 'వ్యాక్సిన్ వచ్చే వరకు పాఠశాలలు తెరవద్దు'
