బిహార్ అసెంబ్లీ ఎన్నికల్లో భాగంగా మొదటి ఫేజ్ పోలింగ్ ఈ నెల 28న జరగనుంది. ఈ నేపథ్యంలో సోమవారం సాయంత్రంతో మొదటి దఫా పోలింగ్ జరిగే 16 జిల్లాల్లోని 71 నియోజకవర్గాల్లో ఎన్నికల ప్రచారానికి తెరపడింది. మొదటి ఫేజ్లో ఆర్జేడీ అత్యధికంగా 42 స్థానాల్లో బరిలోకి దిగుతోంది.
ప్రచారాలతో ముగింపు..
సోమవారం భాజపా ప్రెసిడెంట్ జేపీ నడ్డా, జేడీయూ నేతలు కలిసి ఔరంగాబాద్, పుర్ణియా ప్రాంతాల్లో ప్రచారం నిర్వహించారు. ముఖ్యమంత్రి నితీశ్కుమార్ ముజాఫర్పుర్లోని సక్రా, మహువా ప్రాంతాలు సహా వైశాలీ జిల్లా మహానర్ నియోజకవర్గంలోని జందహాలో ర్యాలీలు చేపట్టారు.
తేజస్వీ యాదవ్ సమస్తిపుర్ జిల్లాలోని హసన్పుర్లో ప్రచారం నిర్వహించారు. తన అన్న తేజ్ ప్రతాప్ యాదవ్ ఇదే ప్రాంతం నుంచి పోటీ చేస్తున్నారు. ఈ ప్రాంతంలో జేడీయూ సిట్టింగ్ ఎమ్మెల్యే రాజ్కుమార్ బలమైన అభ్యర్థిగా తేజ్తో అమీతుమీ తేల్చుకోనున్నారు. రాఘోపుర్ అసెంబ్లీ నియోజకవర్గంలో పర్యటనతో ప్రచారం ముగించారు తేజస్వీ.
లోక్జనశక్తి పార్టీ చీఫ్ చిరాగ్ పాస్వాన్ కూడా 'బిహార్ ఫస్ట్, బిహారీ ఫస్ట్' నినాదంతో ముమ్మరంగా ప్రచారం చేశారు. ఆయన ర్యాలీలకు యువత ఎక్కువగా హాజరయ్యారు.
తొలిదఫా పోలింగ్ వివరాలివే..
- పోలింగ్ జరగనున్న నియోజకవర్గ స్థానాలు: 71
- పోలింగ్ జరిగే జిల్లాలు: 16
- పోటీ చేస్తున్న సభ్యుల సంఖ్య: 1066 (పురుషులు 952, మహిళలు 114)
- మొత్తం ఓటర్లు: 2కోట్ల 14లక్షల 84వేల 787( పురుషులు 1,12,76,396మహిళలు: 1,01,29,101 మూడో జెండర్: 599 సర్వీస్ ఓట్లు: 78,691)
- పోలింగ్ కేంద్రాలు: 31380
- తొలిదఫాలో పార్టీలు పోటీచేస్తున్న స్థానాలు: జేడీయూ- 35, భాజపా - 29, ఆర్జేడీ - 42, కాంగ్రెస్ - 21, వామపక్షాలు- 8
నవంబర్ 3న రెండోదశ, నవంబర్ 7న మూడోదశ పోలింగ్ జరగనుంది. నవంబర్ 10న అసెంబ్లీ ఎన్నికల ఫలితాలు వెలువడనున్నాయి.
