దిల్లీ-అమృత్సర్ రైల్వే లైన్లపై రెండు రోజులుగా పంజాబ్ రైతులు చేస్తోన్న ధర్నాను బుధవారం విరమించారు. పంజాబ్, హర్యానా హైకోర్టు కలుగజేసుకున్నందున రైతులు ధర్నా విరమించారని పోలీసులు తెలిపారు. ధర్నాకు ప్రాతినిధ్యం వహిస్తోన్న 'కిసాన్ మజ్దూర్ సంఘర్ష్' కమిటీ నేతలకు వ్యతిరేకంగా హై కోర్టులో మంగళవారం ఓ పిటిషన్ దాఖలైంది.
దీంతో బుధవారం కోర్టుకు హాజరవ్వాలని కమిటీ నేతలను కోర్టు ఆదేశించింది. కోర్టుకు హాజరయ్యేందుకు రైతు నేతలు హామీ ఇచ్చినట్లు పోలీసులు తెలిపారు.
రైతుల ధర్నా కారణంగా రెండు రోజుల్లో 11 రైళ్లు రద్దయ్యాయి. 38 రైళ్లను దారి మళ్లించినట్లు రైల్వే అధికారులు తెలిపారు.
'కిసాన్ మజ్దూర్ సంఘర్ష్' కమిటీ నేతృత్వంలో పంజాబ్ రైతులు పూర్తి రుణమాఫీతో పాటు పలు ఇతర డిమాండ్లతో ధర్నాకు దిగారు. వాటిలో ముఖ్యంగా స్వామినాథన్ కమిషన్ సిఫార్సు అమలు చేయాలని పట్టుపట్టారు.
