భాజపా సీనియర్ నాయకురాలు, విదేశాంగ మాజీ మంత్రి సుష్మా స్వరాజ్ మంగళవారం రాత్రి తుదిశ్వాస విడిచారు. గత కొద్ది రోజులుగా గుండె సంబంధిత సమస్యతో బాధపడుతున్న ఆమె.. దిల్లీలోని ఎయిమ్స్ ఆసుపత్రిలో చికిత్స పొందుతూ మరణించారు.
తన ఎన్నో ఏళ్ల సుదీర్ఘ రాజకీయ ప్రస్థానంలో దేశానికి చిరస్మరణీయ సేవలు అందించి సుష్మా స్వరాజ్ కీలక నేతగా ఎదిగారు. గల్ఫ్ తదితర దేశాల్లో చిక్కుకున్న ఎందరో భారతీయులను విడిపించి.. మహిళలకు అండగా ఉంటూ ఇలా ప్రతి విషయంలోనూ తనదైన ప్రత్యేక ముద్ర వేసుకున్నారు.
విదేశాల్లో చిక్కుకున్న భారతీయులను వెనక్కు రప్పించడంలో సుష్మా సేవలు మరువలేనివి. ఇందుకు ఆమె ఎంచుకున్న ఆయుధం ట్విట్టర్. సుష్మా స్వరాజ్ తుదిశ్వాస విడితే కొద్ది గంటల ముందు ఆమె ట్వీట్ ఏంటో తెలుసా. జమ్ముకశ్మీర్కు ప్రత్యేక ప్రతిపత్తి కల్పించే అధికరణ-370 రద్దుపై ప్రధాని నరేంద్ర మోదీకి అభినందనలు తెలుపుతూ ట్వీట్ చేశారు. ట్విట్టర్తో మరింత ప్రసిద్ధి చెందిన సుష్మా స్వరాజ్ చివరి ట్వీట్ ఇదే. మంగళవారం సాయంత్రం 7 గంటల 23 నిమిషాల సమయంలో ఈ ట్వీట్ చేశారామె. జమ్ముకశ్మీర్ పునర్విభజన బిల్లుకు పార్లమెంటు ఆమోదంతో సుష్మా హర్షం వ్యక్తం చేశారు.
''ప్రధాని నరేంద్రమోదీకి నా ధన్యవాదాలు. నా జీవితంలో ఈ రోజు కోసం ఎంతగానో ఎదురు చూశాను.''
-సుష్మా స్వరాజ్ చివరి ట్వీట్
ఆగస్టు 5న జమ్ముకశ్మీర్లో అధికరణ-370 రద్దు, రాష్ట్ర పునర్విభజన బిల్లుకు రాజ్యసభ ఆమోదం అనంతరం.. కేంద్ర హోం మంత్రి అమిత్ షాకు అభినందనలు తెలుపుతూ ట్వీట్ చేశారు. అదే రోజు 'జమ్మూ' బిల్లుల తీర్మానాన్ని ఆమోదించినందుకు రాజ్యసభ సభ్యులందరికీ అభినందనలు తెలిపారు.
తలాక్ బిల్లుపైనా...
ముస్లిం మహిళలను ఉద్దేశించి కేంద్ర ప్రభుత్వం రూపొందించిన ముమ్మారు తలాక్ బిల్లుపైనా జులై 30వ తేదీ సుష్మా స్వరాజ్ ట్వీట్ చేశారు. అదే రోజు తలాక్ బిల్లుకు పార్లమెంటు ఆమోదంతో... ప్రధాని మోదీకి అభినందనలు తెలియజేస్తూ ట్వీట్ చేశారు.
''ముమ్మారు తలాక్పై విప్లవాత్మక బిల్లు ఆమోదానికి సహకరించిన ప్రధానమంత్రి, పార్లమెంటు సభ్యులందరికీ నా అభినందనలు.''
-సుష్మా స్వరాజ్, తలాక్ బిల్లు ఆమోదంపై ట్వీట్
