ప్రపంచవ్యాప్తంగా శనివారం ఉదయం ఎయిర్ ఇండియా విమాన సేవలకు దాదాపు 6 గంటలపాటు అంతరాయం కలిగింది. ఎస్ఐటీఏ సర్వర్ షట్డౌన్ అవడం వల్ల ప్రయణికులు బోర్డింగ్ పాసులు పొందలేకపోయారు.
సర్వర్ సమస్య కారణంగా ప్రపంచవ్యాప్తంగా అనేక విమానాశ్రయాల్లో వందలాది మంది ప్రయాణికులు తీవ్ర ఇబ్బందికి గురయ్యారు. తమ అసంతృప్తిని సామాజిక మాధ్యమాల వేదికగా పంచుకున్నారు. దిల్లీ విమానాశ్రంలో బారులు తీరిన ప్రయాణికులు ఆగ్రహంతో పోలిసులతో వాగ్వాదానికి దిగారు.
సర్వర్లో సాంకేతిక లోపం వల్లే సేవలు నిలిచిపోయాయని ఎయిర్ ఇండియా తెలిపింది.
"ఈరోజు ఉదయం 3:30- 4:30 వరకు ప్రయాణికుల సర్వీసు వ్యవస్థ సర్వర్ను నిర్వహణ కోసం షట్ డౌన్ చేశాం. అనంతరం సాంకేతిక లోపం వల్ల సర్వర్ నిలిచిపోయింది. 8:45 వరకు ఇదే పరిస్థితి కొనసాగింది. సర్వర్ను పునరుద్ధరించాం. విమానాల సర్వీసులో అంతరాయం కలిగింది. ప్రయాణికులకు ఎదురైన ఇబ్బందులపై చింతిస్తున్నాం. సాయంత్రానికి సేవలు సాధారణ స్థితికి చేరుకుంటాయని ఆశిస్తున్నాం. ఘటన ప్రభావం రోజంతా ఉండే అవకాశముంది."
--- అశ్విని లొహాని, ఎయిర్ ఇండియా సీఎండీ
ఈ ఘటనపై స్పందించిన అట్లాంటాకు చెందిన ఎస్ఐటీఏ ఐటీ సంస్థ... ప్రయాణికుల ఇబ్బందికి చింతిస్తున్నట్టు తెలిపింది. సర్వర్లో సాంకేతిక లోపంపై దర్యాప్తు చేస్తున్నట్టు స్పష్టం చేసింది.
2018లోనూ ఇదే తరహా ఘటన చోటుచేసుకుంది. దేశవ్యాప్తంగా 25 విమాన సేవలకు అంతరాయం కలిగింది.
ఇదీ చూడండి: ఓటు భారతం కోసం విద్యార్థుల 'వందేమాతరం'
