ఐక్యరాజ్య సమితి భద్రత మండలికి ఎన్నికైన వేళ కీలక విషయాలు వెల్లడించింది భారత్. యూఎన్ఎస్సీలో ఉగ్రవాద నిర్మూలన చర్యలను బలోపేతం చేయటం, తీవ్రవాద సంస్థలపై ఆంక్షలు విధించే అంశంపై రాజకీయాల ప్రభావం తగ్గించటం తమ ప్రాధాన్య అంశాలలో ప్రధానమైనవి స్పష్టం చేసింది. భద్రత మండలిలో ప్రాతినిధ్యం వహించని దేశాల గొంతుకని వినిపించేందుకు భారత్ ఎదురుచూస్తోందని పేర్కొన్నారు విదేశాంగ శాఖ కార్యదర్శి వికాస్ స్వరూప్.
" యూఎన్ఎస్సీలో ఉగ్రవాద నిర్మూలన చర్యలను బలోపేతం చేయటం మా ప్రాధాన్యాంశాల్లో ఒకటి. గతంలో 2011-12లో భద్రత మండలిలో సభ్యులుగా ఉన్నప్పుడు.. తీవ్రవాద నిర్మూలన కమిటీకి అధ్యక్షత వహించాం. సభ్య దేశాల్లో ఉగ్రవాదంపై ఉక్కుపాదం మోపాల్సిందేనన్న భావనను తీసుకొచ్చాం. 1996లో భారత్ ప్రతిపాదించిన అంతర్జాతీయ ఉగ్రవాదంపై సమగ్ర సదస్సును త్వరితగతంగా ఏర్పాటుకు కృషి చేస్తాం."
- వికాస్ స్వరూప్, విదేశాంగ శాఖ కార్యదర్శి.
అంతర్జాతీయ సంస్థల వేదికగా ద్వైపాక్షిక సమస్యలను పాకిస్థాన్ ప్రతినిధి లేవనెత్తితే పరిస్థితి ఏంటి? అని అడిగిన ప్రశ్నకు.. గత కొన్నేళ్లుగా పాక్ అదే విధంగా ప్రవర్తిస్తోందని సమాధానమిచ్చారు స్వరూప్. బహుపాక్షిక సంస్థల వేదికగా ద్వైపాక్షిక సమస్యలను లేవనెత్తుతూ వస్తోందని స్పష్టం చేశారు. ప్రధానమంత్రి నరేంద్ర మోదీ సంస్కరించిన బహుపాక్షికత, విదేశాంగ విధానంలోని 5ఎస్ ( సమ్మాన్ (గౌరవం), సంవాద్ (చర్చలు), సయ్యోగ్(సహకారం), శాంతి, , సార్వత్రిక సమృద్ధి) వ్యూహాలతో ఐరాస భద్రత మండలిలో భారత్ పని చేస్తుందని తెలిపారు.
ఇదీ చూడండి: చైనా వ్యూహమేంటి? గల్వాన్ ఘటనతో లక్ష్యం నెరవేరిందా?
