సార్వత్రిక ఎన్నికల మూడో విడతకు సంబంధించి హోరాహోరీగా జరిగిన ప్రచారానికి తెరపడింది. ఏప్రిల్ 23న మొత్తం 15 రాష్ట్రాల్లో 116 నియోజకవర్గాలకు పోలింగ్ జరగనుంది. రెండో విడతలో ఎన్నికలు జరగకుండా వాయిదా పడ్డ త్రిపురలోని స్థానం కూడా ఇందులో ఉంది.
ముమ్మర ఏర్పాట్లు..
పోలింగ్ ప్రశాంతంగా, పారదర్శకంగా నిర్వహించేందుకు ఎన్నికల సంఘం ఏర్పాట్లు చేస్తోంది. గత విడతలో పశ్చిమబంగాలో జరిగిన హింసాత్మక ఘటనల దృష్ట్యా భారీగా బలగాలను మోహరిస్తోంది.
రేపు రాత్రికల్లా ఈవీఎంలతో పాటు అధికారులు పోలింగ్ కేంద్రాలకు చేరుకుంటారు.
దక్షిణ భారతంలో పోలింగ్ పూర్తి...
కేరళలోని 20 స్థానాలకు ఈ దశలోనే పోలింగ్ పూర్తికానుంది. కర్ణాటకలో మిగిలి ఉన్న 14 స్థానాలకు ఎన్నిక జరగనుంది. తమిళనాడులో ఎన్నిక రద్దయిన వెల్లూరు స్థానం మినహాయిస్తే... దక్షిణ భారతం మొత్తానికి ఈ విడతతో పోలింగ్ పూర్తి కానుంది.
కర్ణాటకలో ప్రధానపోటీ కాంగ్రెస్-జేడీఎస్ కూటమికి, భారతీయ జనతా పార్టీకి ఉండనుంది. మండ్యలో అంబరీష్ భార్య, సినీ నటి సుమలత.... ముఖ్యమంత్రి కుమార స్వామి కుమారుడు నిఖిల్ గౌడ మధ్య పోరుపై ఉత్కంఠ నెలకొంది.
గుజరాత్లో పోటాపోటీ...
మోదీ సొంత రాష్ట్రమైన గుజరాత్లోని మొత్తం 26 సీట్లకు ఈ విడతలోనే పోలింగ్ పూర్తి కానుంది. రాష్ట్రంలో అధికారంలో ఉన్న భాజపాకు కాంగ్రెస్ గట్టిపోటీ ఇస్తోంది. గోవా, ఛత్తీస్గఢ్లో ప్రధాన పోటీ ఈ 2 పార్టీల మధ్యే ఉండనుంది.
ప్రాంతీయ కోటల్లో జెండా ఎగరవేయాలని..
ఒడిశాలో 6 లోక్సభ స్థానాలు, వాటి పరిధిలోని అసెంబ్లీ స్థానాలకు ఈ దశలో పోలింగ్ జరగనుంది. ఇక్కడ నవీన్ పట్నాయక్ సారథ్యంలోని బిజూ జనతా దళ్ 2000 సంవత్సరం నుంచి అధికారంలో ఉంది. ఈ సారి ఎలాగైనా అధికారం చేజిక్కించుకోవాలని భాజపా ఆశిస్తోంది.
పశ్చిమ బంగాలో మమతా బెనర్జీ నేతృత్వంలోని తృణమూల్ కాంగ్రెస్తో భాజపా ఢీ కొడుతోంది. ఈశాన్య రాష్ట్రంలోని ప్రాంతీయ పార్టీ అయిన అసోం గణ పరిషత్కు భాజపాకు మధ్య పోటీ ఉంది.
