గుజరాత్ బారుచ్ జిల్లాలోని కంబోడియా గ్రామంలో జరిగిన అగ్ని ప్రమాదంలో 18 పశువులు మరణించాయి. ఆదివారం జరిగిన ఈ ఘటనలో 9 ఆవులు, 8 లేగ దూడలు చనిపోయినట్లు యజమాని రామ్ రాపోలియా తెలిపారు. మొదట మంటలను అదుపు చేసేందుకు ప్రయత్నంచినప్పటికీ చుట్టూ వ్యాపించాయన్నారు. ఈ క్రమంలో పాకలో ఉన్న 28 పశువుల్లో 18 అక్కడికక్కడే విగతజీవులగా మారాయని ఆవేదన వ్యక్తం చేశారు.
తన కుటుంబ పోషణకు దన్నుగా ఉన్న పశుసంపదను కోల్పోయానని రామ్ కన్నీటి పర్యంతం అయ్యారు. ఈ ప్రమాదంలో సుమారు 12 లక్షలు నష్టం వాటిల్లినట్లు పేర్కొన్నారు.
ఈ ఘటనలో గాయపడిన జంతువులకు స్థానికంగా ఉండే పశుసంవర్థక శాఖ అధికారులు చికిత్స చేశారు. ఘటనాస్థలిని పరిశీలించిన పోలీసులు అగ్ని ప్రమాదంతోనే పశువులు మృతి చెందినట్లు ప్రాథమిక నిర్ధరణకు వచ్చారు. దీనిపై కేసు నమోదు చేసి దర్యాప్తు ప్రారంభించారు.
