రాజ్యసభ ఉప ఎన్నికల తేదీపై ప్రకటన చేసింది భారత ఎన్నికల సంఘం. ఆరు ఖాళీ స్థానాలకు ఉప ఎన్నికల కోసం ఈ నెల 18 నోటిఫికేషన్ జారీ చేయనున్నట్లు తెలిపింది. జులై 5న ఎన్నికలు... అదే రోజున ఓట్ల లెక్కింపు ప్రక్రియ పూర్తి చేసేందుకు సన్నాహాలు ప్రారంభించింది ఈసీ. ఇందులో లోక్సభకు ఎన్నికైన భాజపా జాతీయ అధ్యక్షుడు అమిత్ షా స్థానమూ ఉంది.
పార్లమెంట్లోని అన్ని సభల్లో ఏర్పడిన ఖాళీలను ప్రత్యేక ఖాళీలుగా పరిగణిస్తున్నట్లు స్పష్టం చేసింది ఈసీ. వీటికి ప్రత్యేక నోటిఫికేషన్లు జారీ చేసి, ప్రత్యేక ఎన్నికలు నిర్వహిస్తామని ఓ ప్రకటనలో తెలిపింది. అందుకు 1994, 2009లో దిల్లీ హైకోర్టు ఇచ్చిన రెండు తీర్పులను ఉదహరించింది. ప్రజాప్రాతినిధ్య చట్టం నియమాల ప్రకారం ఒకే రాష్ట్రంలో వేరు వేరుగా ఎన్నికలు నిర్వహించేందుకు ఈ తీర్పులు మద్దతు తెలుపుతున్నాయని పేర్కొంది.
కాంగ్రెస్ డిమాండ్..
గుజరాత్లో ఇటీవల ఖాళీ అయిన రెండు స్థానాలకు ఒకేసారి ఎన్నికలు నిర్వహించాలని కాంగ్రెస్ డిమాండ్ చేసింది. షా, కేంద్ర మంత్రి స్మృతి ఇరానీల స్థానాలు ఖాళీ అయ్యాయి. ఈ రెండింటిలో ఒక్క స్థానంలోనైనా గెలిచే అవకాశముందని భావిస్తోంది కాంగ్రెస్. వేరు వేరుగా ఎన్నికలు నిర్వహిస్తే భాజపాకు లబ్ధి చేకూరుతుందని అభిప్రాయం వ్యక్తం చేసింది.
బిహార్లోని కేంద్ర మంత్రి రవిశంకర్ ప్రసాద్ స్థానం, ఒడిశాలోని అచ్యుతానంద సమంత స్థానాలు ఖాళీ అయ్యాయి. వాటితో పాటు ఒడిశాలోని మరో రెండు స్థానాలకు ఎన్నికలు జరుగనున్నాయి.
ఇదీ చూడండి: వాన నీటిని ఒడిసిపట్టండి: సర్పంచులకు ప్రధాని లేఖ
