'అయోధ్య కాదు.. విద్య, ఉద్యోగాలపై దృష్టిసారించండి'

అయోధ్య భూవివాదంపై సుప్రీంకోర్టు వెలువరించిన చారిత్రక తీర్పుపై రివ్యూ పిటిషన్​ దాఖలు చేస్తామన్న నిర్ణయాన్ని ప్రముఖ ఆధ్యాత్మిక గురువు శ్రీశ్రీ రవిశంకర్ తప్పుబట్టారు. అఖిల భారత ముస్లిం పర్సనల్ లా బోర్డు, జమాయిత్ ఉలేమా-ఇ-హింద్​ తీసుకున్న నిర్ణయం.. వారి ద్వంద్వ వైఖరికి అద్దం పడుతోందని వ్యాఖ్యానించారు. దేశంలో చక్కదిద్దాల్సిన పనులు చాలా ఉన్నాయని.. ఇక అయోధ్య అంశాన్ని వీడి వాటిపై దృష్టి సారించాలని సూచించారు.

అయోధ్య అంశంపై.. అఖిల భారత ముస్లిం పర్సనల్ లా బోర్డు, జమాయిత్ ఉలేమా-ఇ-హింద్​ ద్వంద్వ వైఖరిని ప్రదర్శిస్తున్నాయని అభిప్రాయపడ్డారు ప్రముఖ ఆధ్యాత్మిక గురువు శ్రీ శ్రీ రవిశంకర్. సుప్రీం తీర్పుపై రివ్యూ పిటిషన్​ దాఖలు చేస్తామని నిర్ణయించడమే ఇందుకు కారణమన్నారు. ఇక అయోధ్య అంశాన్ని పక్కనపెట్టి హిందూ, ముస్లింలందరూ కలిసి దేశ ఆర్థిక వ్యవస్థను బలోపేతం చేయడానికి కృషి చేయాలని పిలుపునిచ్చారు. దశాబ్ద కాలంగా నలిగిన అయోధ్య భూవివాదంలో సుప్రీంకోర్టు ఇచ్చిన తీర్పు పట్ల హర్షం వ్యక్తం చేశారు రవిశంకర్​.

"సుప్రీంకోర్టు తీర్పు పట్ల సంతృప్తిగా ఉన్నా. రెండు వర్గాలు కలిసి ఓ వైపు మందిరం మరోవైపు మసీదు నిర్మించాలని నేను 2003 నుంచి చెబుతున్నా. వివాదాస్పద స్థలంలోనే మసీదు నిర్మిస్తామని కొందరు పట్టుబట్టడం అర్థం లేని విషయం. ఒక్కొక్కరి ఆలోచనలు ఒక్కోలా ఉంటాయి. సహజంగానే తీర్పు ద్వారా ప్రతీ ఒక్కరినీ సంతోషపెట్టలేము. ఇప్పుడు రివ్యూ పిటిషన్​ దాఖలు చేస్తామని చెప్పినవారే ధర్మాసనం నిర్ణయాన్ని గౌరవిస్తామని గతంలో అన్నారు. వారు మాట మార్చారు. ఒకప్పుడు.. తీర్పు వారికి అనుకూలంగా లేకపోయినా గౌరవిస్తామన్నారు. ఇది కచ్చితంగా ద్వంద్వ వైఖరిగా ఉంది. సమాజంలో చేయాల్సిన పనులు చాలా ఉన్నాయి. విద్య, ఉద్యోగాలు, నిరుద్యోగంపై దృష్టిసారించాల్సిన సమయం ఇది. పారిశ్రామికవేత్తలను తయారుచేసి ఆర్థిక వ్యవస్థను మరింత ముందుకు తీసుకెళ్లే విధంగా ఆలోచించాలి."-శ్రీశ్రీ రవిశంకర్, ఆధ్యాత్మిక గురువు.

ఆర్థిక వ్యవస్థ మందగమనం నేపథ్యంలో... మెరుగైన ఆర్థిక వ్యవస్థ కోసం అన్ని వైపుల నుంచి ప్రయత్నాలు చేయాలని సూచించారు రవిశంకర్​. మందిరం-మసీదుల వివాదాలు ఆర్థిక వ్యవస్థపై ప్రభావం చూపించే అవకాశం లేదని స్పష్టం చేశారు.

ఇదీ చూడండి: అయోధ్య తీర్పు రివ్యూ.. 99 శాతం ముస్లింల ఆకాంక్ష