సార్వత్రిక ఎన్నికల నాలుగో దశ పోలింగ్లో 9 రాష్ట్రాల్లోని 72 లోక్సభ స్థానాలకు ఓటింగ్ జరిగింది. మొత్తం 64శాతం పోలింగ్ నమోదైంది. బంగాల్, ఒడిశా రాష్ట్రాల్లోని కొన్ని ప్రాంతాల్లో ఘర్షణలు జరిగాయి. కొన్ని కేంద్రాల్లో ఈవీఎంలు మొరాయించాయి. బంగాల్లో అత్యధికంగా 76.66 శాతం పోలింగ్ నమోదైంది. జమ్ముకశ్మీర్లోని అనంత్నాగ్లో 10.5 శాతం ఓట్లే పోలయ్యాయి. 943 మంది అభ్యర్థుల భవితవ్యాన్ని ఓటర్లు ఈవీఎంలలో నిక్షిప్తం చేశారు.
ఓటెత్తిన భారతావని...
పోలింగ్ కేంద్రాలకు ప్రజలు ఉత్సాహంగా తరలివచ్చారు. ఒడిశా, ఉత్తర్ప్రదేశ్, బిహార్, మహారాష్ట్రలో పలు చోట్ల ఈవీఎంలు మొరాయించాయి. ఆయా కేంద్రాల్లో పోలింగ్ ఆలస్యంగా ప్రారంభమైంది.
ఘర్షణలు...
బంగాల్ అసాన్సోల్లో తమ పోలింగ్ బూత్ ఏజెంట్కు లంచం ఇవ్వజూపారన్న కారణంతో తృణమూల్ కార్యకర్తలు కేంద్రమంత్రి బాబుల్ సుప్రియోతో గొడవకు దిగారు. ఆయన కారును ధ్వంసం చేశారు. మరో చోట భద్రత కోసం కేంద్ర బలగాల్ని వినియోగిస్తున్నారన్న కారణంతో ఓటేయడానికి నిరాకరించారు స్థానికులు.
ఒడిశాలో పోలింగ్ ఏజెంట్గా విధుల్లో ఉన్న ఓ వ్యక్తి మృతి చెందారు. ఒడిశా మహంగా అసెంబ్లీ సెగ్మెంట్లో ఇరువర్గాల మధ్య ఘర్షణ తలెత్తి ఎన్నికను బహిష్కరించారు.
ప్రముఖుల ఓటు...
ఎన్సీపీ అధినేత శరద్పవార్, కేంద్రమంత్రి గిరిరాజ్సింగ్, కన్నయ్యకుమార్ నాలుగో దఫా ఎన్నికల్లో ఓటు వేశారు.
తారలు, పారిశ్రామికవేత్తలు ఉదయమే...
ముంబయిలోని సినీ తారలు, పారిశ్రామికవేత్తలు ఉదయమే ఓటుహక్కు వినియోగించుకున్నారు. రిలయన్స్ అధినేత ముఖేశ్ అంబానీ, సోదరుడు అనిల్ అంబానీ, మహీంద్ర గ్రూప్ ఛైర్మన్ ఆనంద్ మహీంద్రా, రిజర్వు బ్యాంకు ఛైర్మన్ శక్తికాంతాదాస్ ఓటు వేశారు.
ఇవీ చూడండి:
