వైద్యుల నిర్లక్ష్యం కారణంగా ఒక వృద్ధురాలు రెండుసార్లు శస్త్రచికిత్స చేయించుకోవాల్సి వచ్చింది.
ఇదీ జరిగింది...
హరియాణాలోని భివానీకి చెందిన భతేరి దేవి అనే వృద్ధురాలు ప్రమాదవశాత్తు జారి కిందపడగా... కాలు విరిగింది. వెంటనే ఆమె కుటుంబ సభ్యులు భన్సీలాల్ ఆసుపత్రికి తీసుకువచ్చారు. పరీక్షించిన వైద్యులు.. ఆమె ఎడమ కాలికి శస్త్రచికిత్స చేశారు. అయితే విరిగింది 'కుడి కాలు'కాగా.. ఎడమ కాలికి ఆపరేషన్ చేశారేంటని కుటుంబ సభ్యులు అడగ్గా... మరోసారి శస్త్రచికిత్స చేశారు. అయితే.. రెండోసారి ఆపరేషన్ సమయంలో తమకు ఎలాంటి బిల్లు వేయలేదని దేవి బంధువులు తెలిపారు. వైద్యుల నిర్లక్ష్యం కారణంగానే ఇలా జరిగిందని.. తమకు న్యాయం చేయాలని వారు డిమాండ్ చేశారు.
విచారణకు ఆదేశం..
ఈ ఘటనపై అంతర్గత దర్యాప్తునకు ఆదేశించినట్టు భివానీ ఆసుపత్రి ప్రధాన వైద్యాధికారి(సీఎంఓ) డాక్టర్ సప్నా గెహ్లోత్ ప్రకటించారు. ముఖ్య వైద్యాధికారి(పీఎంఓ) డాక్టర్ రఘువీర్ శాండిల్య ఆధ్వర్యంలో ఒక కమిటీని ఏర్పాటు చేసినట్లు వెల్లడించారు. తప్పుగా శస్త్రచికిత్స జరిగినట్టు తేలితే.. సదరు వైద్యులపై చర్యలు తీసుకుంటామని స్పష్టం చేశారు.
అయితే ఆ మహిళకు రెండు కాళ్ల ఎముకలు విరిగాయని.. అందుకే రెండుసార్లు శస్త్రచికిత్స చేయాల్సి వచ్చిందని ఆపరేషన్ చేసిన వైద్యుడు వివరించారు.
ఇదీ చదవండి: భర్త వైద్యం కోసం.. కొడుకునే తాకట్టు పెట్టిన తల్లి
