జయలలిత అనుమానస్పద మృతిపై సమగ్ర దర్యాప్తు జరిగితేనే అసలు వాస్తవాలు వెలుగులోకి వస్తాయని వ్యాఖ్యానించారు స్టాలిన్. ఆమె మరణం వెనక ఉన్న కుట్రదారులను ఊచలు లెక్కపెట్టిస్తామని అన్నారు.
ఈ ప్రకటన ఎన్నికల్లో లబ్ధి కోసం చేయటం లేదని స్టాలిన్ స్పష్టం చేశారు. ఏఐఏడీఎంకే అధినేత్రి మరణం అనంతరం కార్యకర్తల మనోవేదనను అర్థం చేసుకునే ఈ నిర్ణయం తీసుకున్నామన్నారు స్టాలిన్. పొల్లాచ్చిలో డీఎంకే అభ్యర్థి తరఫున ఎన్నికల ప్రచారం నిర్వహించారు.
డీఎంకే కోశాధికారి ఇంట్లో ఇటీవల ఐటీ అధికారులు నిర్వహించిన సోదాలపై విమర్శలు గుప్పించారు స్టాలిన్. అధికార పార్టీ తరఫున పోలీసులే డబ్బును తరలిస్తూ ఓటర్లకు పంచుతున్నారని ఆరోపించారు.
అనారోగ్యానికి గురై ఆసుపత్రిలో చికిత్స పొందుతూ డిసెంబరు 5, 2016న జయలలిత మృతిచెందారు.
ఆమె మృతిపై అనేక అనుమానాలు వ్యక్తమయ్యాయి. తమిళనాడులో ఊహించని రాజకీయ పరిణామాలు జరిగాయి. జయలలిత మృతిపై విచారణ జరిపేందుకు విశ్రాంత హైకోర్టు న్యాయమూర్తి సారథ్యంలో విచారణ కమిషన్ను ఏర్పాటు చేసింది తమిళనాడు ప్రభుత్వం.
ఇదీ చూడండి:భారత్ భేరి: కర్ణాటకలో 'క్షుద్ర'రాజకీయాలు!
