అత్యంత రహస్యమైన పత్రాలు కలిగి ఉన్నాడన్న ఆరోపణలపై ఫ్రీలాన్స్ పాత్రికేయుడు రాజీవ్శర్మను దిల్లీ స్పెషల్ సెల్ పోలీసులు అరెస్టు చేశారు. దిల్లీలోని పీతాంపురాకు చెందిన ఆయన వద్ద.. రక్షణశాఖకు సంబంధించి రహస్య సమాచారాన్ని గుర్తించామని పోలీసులు తెలిపారు. ఈ సున్నితమైన సమాచారాన్ని చైనా నిఘాకు రాజీవ్ అందించినట్టు పేర్కొన్నారు.
అధికార రహస్యాల చట్టం కింద ఈనెల 14న ఆయన్ను అరెస్టు చేసి, మరుసటి రోజు మేజిస్ట్రేట్‌ కోర్టులో హాజరు పరిచినట్టు డీసీపీ సంజీవ్‌కుమార్‌ యాదవ్‌ వెల్లడించారు. రాజీవ్‌శర్మ ప్రస్తుతం పోలీసు కస్టడీలో ఉన్నాడని, అతని బెయిల్‌ పిటిషన్‌పై ఈ నెల 22న విచారణ జరగనుందని డీసీపీ తెలిపారు.
అయితే ఈ కేసుకు సంబంధించి ఓ చైనా మహిళతో పాటు మరో నేపాల్ వ్యక్తిని అదుపులోకి తీసుకున్నారు పోలీసులు. వీరు ఓ షెల్ కంపెనీ ద్వారా రాజీవ్కు భారీ మొత్తంలో డబ్బులు చెల్లించినట్టు పోలీసులు పేర్కొన్నారు.
ఇదీ చూడండి:- షోపియాన్ ఎన్కౌంటర్ కేసులో కీలక మలుపు
