పాకిస్థాన్ గూఢచర్య సంస్థ ఐఎస్‌ఐకి సున్నితమైన సమాచారాన్ని చేరవేస్తున్న ఇద్దరు రక్షణ శాఖ ఉద్యోగులను రాజస్థాన్ పోలీసులు సోమవారం అరెస్టు చేశారు. వీరిని పట్టుకోవడానికి సైనిక గూఢచర్య సంస్థ (ఎంఐ) ఆధ్వర్యంలో ఏడాదిగా ఆపరేషన్ నడిచింది. నిందితులను వికాస్‌ కుమార్‌ (29), చిమన్‌ లాల్‌ (29)గా గుర్తించారు. వికాస్‌.. రాజస్థాన్‌లోని శ్రీగంగానగర్‌లో సైనిక మందుగుండు సామగ్రి డిపోలో పనిచేస్తున్నాడు. బీకానేర్‌లో సైన్యానికి చెందిన ‘మహాజన్‌ ఫీల్డ్‌ ఫైరింగ్‌ రేంజ్‌ (ఎంఎఫ్‌ఎఫ్‌ఆర్‌)లో కాంట్రాక్టు ఉద్యోగిగా చిమన్‌లాల్‌ పనిచేస్తున్నాడు. పాకిస్థాన్ సరిహద్దుల వెంబడి ఉన్న ఈ రెండు స్థావరాలు.. వ్యూహాత్మకంగా చాలా కీలకమైనవి.
గతేడాది ప్రారంభమైన ఆపరేషన్
ఈ ‘ఇంటి దొంగల’ గుట్టును విప్పడానికి ఎంఐలోని లఖ్‌నవూ విభాగం, ఉత్తర్‌ప్రదేశ్‌లోని ఉగ్రవాద నిరోధక దళం (ఏటీఎస్‌) ‘డెజర్ట్‌ చేజ్‌’ పేరిట గత ఏడాది ఆగస్టులో ఆపరేషన్‌ను చేపట్టాయి. అనూష్క చోప్రా అనే నకిలీ పేరుతో పాక్ గూఢచారి ఒకరు వికాస్‌కు గాలం వేసినట్లు అధికారులు గుర్తించారు. ఆమెను పాకిస్థాన్‌లోని ముల్తాన్‌కు చెందిన యువతిగా నిర్ధరించారు. బీకానేర్‌లో సైన్యం, మందుగుండు సామగ్రి, విన్యాసాలు, కాల్పుల అభ్యాసం కోసం అక్కడికి వస్తున్న సైనిక విభాగాల వివరాలు, ట్యాంకులు, ఇతర వాహనాల ఫొటోలను వికాస్‌.. పాక్కు చేరవేస్తున్నట్లు నిర్ధరించారు. ఇందుకు ప్రతిఫలంగా అతడికి నగదు అందుతోందని, సోదరుల బ్యాంకు ఖాతాల ద్వారా ఆ సొమ్మును అతడు అందుకున్నట్లు తేల్చారు. చిమన్‌లాల్‌ ద్వారా ఎంఎఫ్‌ఎఫ్‌ఆర్‌లో నీటి పంపిణీ రిజిస్టర్‌కు సంబంధించిన ఫొటోలను వికాస్‌ సేకరిస్తున్నట్లు అధికారులు గుర్తించారు.
ఆధారాలతో అరెస్టు
అయితే ఈలోగా కరోనా లాక్‌డౌన్‌ రావడంతో కేసు దర్యాప్తులో పురోగతి నిలిచిపోయింది. మే మొదటి వారంలో మరిన్ని ఆధారాలు లభించడంతో సైనిక గూఢచారి విభాగం అధికారులు, రాజస్థాన్ పోలీసులు చర్యలకు ఉపక్రమించారు. వికాస్‌, చిమన్‌లాల్‌ను సోమవారం అరెస్టు చేశారు.
తియ్యని వల
గత ఏడాది మార్చిలో ‘అనూష్క చోప్రా’ పేరుతో ఫేస్‌బుక్‌లో తనకు ‘ఫ్రెండ్‌ రిక్వెస్ట్‌’ వచ్చినట్లు వికాస్‌ అంగీకరించాడు. ఇద్దరం బాగా స్నేహితులమయ్యామని, వాట్సప్‌ నెంబర్లు కూడా ఇచ్చిపుచ్చుకున్నామని చెప్పాడు. చాటింగ్‌తో పాటు ఆడియో, వీడియో కాల్స్‌ చేసుకోవడం ప్రారంభించినట్లు తెలిపాడు. ముంబయిలోని సైనిక క్యాంటిన్‌లో పనిచేస్తున్నట్లు ఆమె చెప్పినట్లు వివరించాడు. ఆమె సూచన మేరకు అనేక వాట్సప్‌ గ్రూపుల్లో చేరానన్నాడు.
డబ్బు కోసం
ఆ తర్వాత సామాజిక మాధ్యమం ద్వారానే అమిత్‌ కుమార్‌ సింగ్‌ అనే వ్యక్తికి వికాస్‌ను ‘అనూష్క’ పరిచయం చేసింది. అతడిని తన బాస్‌గా పేర్కొంది. అయితే అతడు పాక్ గూఢచారి. అమిత్‌ కుమార్‌ అనేది నకిలీ పేరు. సైనిక వివరాలను అందిస్తే డబ్బు ఇస్తానని అతడు వికాస్‌ను ప్రలోభ పెట్టాడు. అప్పటి నుంచి ఈ గూఢచర్యం సాగుతోంది. వికాస్‌ స్వయంగా కానీ చిమన్‌లాల్‌ ద్వారా కానీ సైనిక వివరాలను చేరవేసేవాడు. మహాజన్‌ ఫీల్డ్‌ ఫైరింగ్‌ రేంజ్‌కి సంబంధించిన నీటి పంపిణీ రిజిస్టర్‌లో అక్కడి సైనిక సిబ్బంది పేరు, హోదా, మొత్తం బలగం వివరాలు ఉండటంతో వాటిని చేరవేసేవాడు. అందుకు బదులుగా పాక్ నుంచి రూ.75వేలు అందుకున్నట్లు వికాస్‌ అంగీకరించాడు.
ఇదీ చూడండి: రసాయనాలపై నిషేధం సరే- ప్రత్యామ్నాయం ఏది?
