జ్యోతి రొంగల... ఆంధ్రప్రదేశ్లోని తూర్పు గోదావరి జిల్లాకు చెందిన అమ్మాయి. అందరిలా కాకుండా వినూత్నంగా ఆలోచించిన జ్యోతి... యావత్ దేశాన్ని సైకిల్పై చుట్టేయాలని నిర్ణయించుకుంది. ఎవరి సాయం లేకుండా డబ్బు వినియోగించకుండా ఈ యాత్ర చేపట్టింది. ఇప్పటికే 16 వేల కి.మీ యాత్ర పూర్తిచేసింది. తాజాగా నాగాలాండ్లోని దిమాపుర్కు చేరుకుంది.
ఎందుకు..?
ఇప్పటివరకు సుదూర సైకిల్ యాత్ర రికార్డ్ 18,999 కి.మీ ప్రయాణించిన ఆస్ట్రేలియావాసి పేరిట ఉంది. ఈ రికార్డ్పై కన్నేసింది జ్యోతి. మొత్తం 30 వేల కి.మీ ప్రయాణించేందుకు ప్రణాళిక వేసుకుంది.
"నేను సైకిల్పై అన్ని రాష్ట్రాల్లోనూ తిరుగుతూ దేశవ్యాప్తంగా యాత్ర చేయాలనుకుంటున్నాను. డబ్బు లేకుండా ఒంటరిగా తిరుగుతున్నాను. 30 వేల కి.మీ తిరగడమే నా లక్ష్యం. ఇప్పటికే 19 రాష్ట్రాలు పూర్తి చేశాను. గిన్నిస్ రికార్డ్ అందుకునేందుకు ప్రయత్నిస్తున్నాను. ఈ యాత్ర ద్వారా భారత్లోని రోడ్లు మహిళలకు సురక్షితమనే సందేశాన్ని ఇవ్వాలనుకుంటున్నాను."
- జ్యోతి రొంగల, సైకిల్ యాత్రికురాలు
ఎలా..?
జ్యోతితో పాటు సైకిల్ సామగ్రి, స్లీపింగ్ బ్యాగ్, టెంట్, ప్రథమ చికిత్స కిట్, మొబైల్ మాత్రమే ఉన్నాయి. కొన్నిచోట్ల స్థానికుల ఆతిథ్యం స్వీకరిస్తుంది. ఒక్కొక్క సమయంలో సరైన తిండి, నివాసం లేక ఇబ్బంది పడినా... అలానే ముందుకు సాగుతోంది.
2017 జనవరిలో యాత్ర ప్రారంభించింది జ్యోతి. 9 వేల కి.మీ పూర్తి చేశాక గాయమైంది. ఏడాదిన్నర పాటు విశ్రాంతి తీసుకొని మళ్లీ 2019 జనవరిలో ఈ సైకిల్ యాత్ర పునఃప్రారంభించింది.
అదే లక్ష్యం...
అర్ధరాత్రి ఒంటరిగా... రోడ్డుపై మహిళలు తిరిగగలిగిన నాడే నిజమైన స్వాంతంత్ర్యమని మహాత్మాగాంధీ అన్నారు. అయితే ఒంటరిగా సైకిల్పై దేశ యాత్ర చేస్తూ భారత్లోని రోడ్లు మహిళలకు సురక్షితమనే సందేశాన్ని ఇవ్వాలనుకుంటోంది జ్యోతి.
- ఇదీ చూడండి: వైరల్: యూపీలో 'రౌడీ పోలీస్' దౌర్జన్యం..!
