కరోనా వైరస్ సోకితే దానిని జయించడం అంత సులభమేమీ కాదు. కొన్ని రోజులు వైద్యుల పర్యవేక్షణలో, నిర్బంధంలో ఉన్న తర్వాత కరోనా లక్షణాలు కనిపించకపోతే, వైరస్ శరీరంలో నుంచి పోయినట్టు కాదని చెబుతోంది ఓ అధ్యయనం. కరోనా రోగులు డిస్చార్జ్ అయ్యాక దాదాపు 8 రోజుల పాటు వైరస్ సజీవంగానే ఉంటుందని తేల్చి చెబుతున్నారు.
సగం మందిలో సజీవంగా...
కరోనాను జయించిన 16 మందిపై పరీక్షలు నిర్వహించారు అమెరికా శాస్త్రవేత్తలు. అందులో ఎవరికీ కరోనా లక్షణాలు కనబడలేదు. కానీ, వారి గొంతు నుంచి తీసుకున్న నమూనాలను రోజు విడిచి రోజు క్షుణ్నంగా పరిశీలించగా.. వారిలో సగం మందిలో వైరస్ సజీవంగానే ఉన్నట్లు తేలింది. ఈ అధ్యయనంలో ఏల్ వర్సిటీ తరఫున భారత శాస్త్రవేత్త లోకేశ్ శర్మ పాల్గొన్నారు.
మరో రెండు వారాలు..
నిర్బంధ వార్డుల్లోని కరోనా బాధితులకు.. రెండు సార్లు వైద్యపరీక్షలు నిర్వహించి వైరస్ లేదని నిర్ధరించిన తర్వాతే వారిని ఇళ్లకు పంపుతారు. అయితే, నిర్బంధ కాలాన్ని మరో రెండు వారాల కొనసాగించకపోతే వైరస్ వ్యాప్తి మళ్లీ చెలరేగే ఆవకాశముందని హెచ్చరిస్తున్నారు శర్మ.
"మా అధ్యయనంలో తేలిన విషయం ఏమిటంటే... సగం మంది రోగుల్లో కరోనా లక్షణాలు కనిపించకుండాపోయినా వైరస్ దాదాపు 8 రోజుల వరకు ఉంటుంది. కాబట్టి వైరస్ సోకిన వ్యక్తులు వారి నిర్బంధ కాలాన్ని మరో రెండు వారాల పాటు పొడిగించుకుంటే మంచిది. లేకపోతే వారి ద్వారా మరికొందరికి వైరస్ సోకే ప్రమాదం ఉంది. మేము పరీక్షించిన 16 మందిలో ఇద్దరికి మధుమేహం, ఒకరికి క్షయ వ్యాధి ఉంది. అయితే, కొవిడ్-19 సంక్రమణపై ఈ వ్యాధులు ఎలాంటి ప్రభావం చూపలేదని తెలిసింది."
-లోకేశ్ శర్మ, శాస్త్రవేత్త
అయితే, వృద్ధులు, రోగనిరోధక శక్తి తక్కువగా ఉన్నవారికి ఈ అధ్యయనం వర్తించదని తెలిపారు వైద్యులు.
ఇదీ చదవండి: పురుషులు, వృద్ధులకే కరోనా సోకే అవకాశం ఎక్కువ!
