కేంద్ర పారిశ్రామిక భద్రతా దళం (సీఐఎస్ఎఫ్) సిబ్బందిలో మరో 20 మందికి కరోనా సోకింది. వీరిలో 18 మంది దిల్లీ విమానాశ్రయంలో భద్రత సేవలు అందించారని అధికారులు తెలిపారు. వారందరినీ క్వారంటైన్లో ఉంచినట్లు స్పష్టం చేశారు. ప్రస్తుతం దిల్లీ విమానాశ్రయంలో విధులు నిర్వహించిన మెత్తం 25 మంది సిబ్బంది కరోనాకు చికిత్స పొందుతున్నట్లు అధికారులు పేర్కొన్నారు. సోమవారం మరో 10 మంది వైరస్ నుంచి కోలుకున్నట్లు తెలిపారు. ఇప్పటివరకు సీఐఎస్ఎఫ్లో మహమ్మారి కారణంగా ముగ్గురు మరణించినట్లు వెల్లడించారు.
సుమారు 1.62 లక్షల మంది సిబ్బంది ఉన్న సీఐఎస్ఎఫ్లో.. ప్రస్తుతం 78 యాక్టీవ్ కేసులు ఉన్నాయి. మరో 132 మంది వైరస్ నుంచి కోలుకున్నారు. న్యూక్లియర్, ఎరోస్పేస్ డొమైన్లలో కీలకమైన రక్షణ సేవలు అందిస్తుంది సీఐఎస్ఎఫ్. ప్రస్తుతం 63 విమానాశ్రయాలకు సీఐఎస్ఎఫ్ భద్రత ఇస్తుంది.
