కాంగ్రెస్ అధ్యక్షుడు రాహల్ గాంధీపై ఎఫ్ఐఆర్ నమోదు చేయాలని దాఖలైన పిటిషన్పై ఇప్పటివరకు తీసుకున్న చర్యలపై నివేదిక సమర్పించాలని దిల్లీ కోర్టు పోలీసులను ఆదేశించింది.
2016లో ప్రధాని నరేంద్ర మోదీపై రాహుల్ గాంధీ చేసిన వ్యాఖ్యలు దేశద్రోహాన్ని తలపించేలా ఉన్నాయని న్యాయవాది జోగిందర్ తులి పిటిషన్ దాఖలు చేశారు. రాహుల్పై ఎఫ్ఐఆర్ నమోదు చేయాలని వ్యాజ్యంలో పేర్కొన్నారు.
పిటిషన్ విచారణ సమయంలో 'రాహుల్ వ్యాఖ్యలు ఏదైనా పత్రికలో వచ్చాయా? ఈ విషయం మీ దృష్టికి ఎలా వచ్చింది? 2016లో చేసిన వ్యాఖ్యలపై 2019లో ఎందుకు విచారణ చేయమంటున్నారు' అని న్యాయస్థానం పిటిషనర్ను ప్రశ్నించింది.
'వార్తా పత్రికల్లో రాహుల్ వ్యాఖ్యలు ప్రచురితమయ్యాయి. పోలీసుల వద్ద వీడియో రికార్డు ఉంది. 2016లోనే ఈ విషయంపై పోలీసులకు ఫిర్యాదు చేశాను. కానీ ఇప్పటి వరకు ఎలాంటి చర్యలు తీసుకోలేదు' అని పిటిషనర్ తులి వివరణ ఇచ్చారు. తదుపరి విచారణను న్యాయస్థానం మే 15కు వాయిదా వేసింది.
2016లో రాహుల్ వ్యాఖ్యలు
ప్రధాని నరేంద్ర మోదీ సైనికుల త్యాగాలను అగౌరవపరుస్తున్నారని అక్టోబరు 6, 2016లో ఉత్తరప్రదేశ్ కాంగ్రెస్ సమావేశంలో వ్యాఖ్యానించారు రాహుల్. దీనిని దేశద్రోహంగా పరిగణించాలని న్యాయవాది తులి పిటిషన్ దాఖలు చేశారు.
ఇదీ చూడండి: న్యాయవ్యవస్థ సమగ్రతకు పెద్ద దెబ్బే: జస్టిస్ హెగ్డే
