కరోనా: ఇరాన్​ నుంచి స్వదేశానికి 300 మంది భారతీయులు

కరోనా ప్రభావం తీవ్రంగా ఉన్న ఇరాన్​ నుంచి అక్కడి భారతీయులను స్వదేశానికి తీసుకొచ్చేందుకు ప్రయత్నాలు ప్రారంభించింది కేంద్ర ప్రభుత్వం. ఈ మేరకు ఇప్పటికే ఆ దేశ అధికారులతో మాట్లాడినట్లు ఉన్నతాధికారులు స్పష్టం చేశారు.

ప్రపంచ దేశాలు కరోనా వైరస్​తో విలవిలలాడుతున్నాయి. ఈ నేపథ్యంలో పలు దేశాల్లోని భారతీయులను వెనక్కి తీసుకొచ్చేందుకు కేంద్ర ప్రభుత్వం ప్రయత్నాలు చేస్తూనే ఉంది. ఇప్పటికే చైనా, జపాన్​ నుంచి అక్కడి భారతీయులు చాలా మంది స్వదేశానికి చేరుకున్నారు. ఇప్పుడు కరోనా తీవ్రంగా ఉన్న ఇరాన్​లోని భారతీయుల్ని ప్రత్యేక విమానం ద్వారా భారత్​కు తీసుకురానున్నారు.

ఇరాన్​కు చెందిన మహన్​ ఎయిర్​లైన్స్​ ప్రత్యేక విమానం 300 మందిని తీసుకురానుంది. ఈ ప్రయాణికులను సిబ్బంది.. పూర్తిగా స్క్రీనింగ్​ చేస్తున్నట్లు భారత విమానయాన శాఖ మంత్రి హర్​దీప్​ సింగ్​ పూరి స్పష్టం చేశారు. ఈ రాత్రికల్లా దిల్లీకి చేరుకుంటారని వెల్లడించారు. అదే విమానం.. ఇక్కడి ఇరాన్​ దేశస్థులను తీసుకెళ్తుందని సమాచారం.

ఇదీ చూడండి:చైనాలో కరోనా ధాటికి మరో 30 మంది మృతి