దేశంలో నెమ్మదిగా ప్రారంభమైన కరోనా వైరస్ క్రమంగా విస్తరిస్తోంది. దేశవ్యాప్తంగా 315 మందికి కరోనా పాజిటివ్ వచ్చింది. శనివారం ఒక్క రోజే 60 కొత్త కేసులు నమోదైనట్లు కేంద్ర ఆరోగ్యశాఖ తెలిపింది. నిన్న సాయంత్రం 6 గంటల వరకు 16,021 మందికి చెందిన 16,911 నమూనాలు పరీక్షించినట్లు తెలిపింది.
ఈ 315 మందిలో 17 మంది ఇటాలియన్లు సహా 39 మంది విదేశీయులున్నారు. దిల్లీ, కర్ణాటక, పంజాబ్, మహారాష్ట్ర నుంచి ఒక్కో కరోనా మరణం నమోదైనట్లు కేంద్రం తెలిపింది. 315 కరోనా కేసులలో మహారాష్ట్రలో అత్యధికంగా 63 మంది కొవిడ్-19 బాధితులు ఉన్నారు. కేరళలో ఏడుగురు విదేశీయులు సహా ఇప్పటివరకు మొత్తంగా 40 మందికి కరోనా తేలింది.
వివిధ రాష్ట్రాల్లో కేసుల వివరాలు ఇలా..
| రాష్ట్రం | కేసుల సంఖ్య |
| మహారాష్ట్ర | 63 |
| కేరళ | 40 |
| దిల్లీ | 27 |
| ఉత్తర్ప్రదేశ్ | 24 |
| తెలంగాణ | 21 |
| రాజస్థాన్- హరియాణా | 34 |
| కర్నాటక | 15 |
| పంజాబ్- లద్ధాఖ్ | 26 |
| గుజరాత్ | 7 |
| జమ్ముకశ్మీర్ | 4 |
| ఆంధ్రప్రదేశ్- ఉత్తరాఖండ్- బంగాల్ | 9 |
| ఒడిశా | 2 |
| పుదుచ్చేరి- ఛత్తీస్గఢ్- చండీగఢ్ | 3 |
ఇప్పటివరకూ దేశవ్యాప్తంగా కరోనా సోకిన వారిలో 23 మంది పూర్తిగా కోలుకున్నట్లు కేంద్రం తెలిపింది. విదేశాల నుంచి వచ్చిన 306 మందిని ముంబయిలో ఐసోలేషన్లో ఉంచినట్లు బొంబాయి మునిసిపల్ కార్పొరేషన్ తెలిపింది.
రేపటి నుంచి ఈ నెల 31 వరకు పుదుచ్చేరిలో 144 సెక్షన్ అమల్లో ఉండనుంది. మహారాష్ట్ర ఠాణేలో 10 మందికి మించి గుమిగూడడంపై నిషేధం విధించారు. అసోంలో తొలి కరోనా కేసు నమోదైంది. నాలుగున్నరేళ్ల చిన్నారికి వైరస్ సోకినట్లు అదికారులు తెలిపారు.
ధరల అదుపు...
శానిటైజర్లు, మాస్కుల ధరలు ఇష్టారీతిన పెంచడంపై కేంద్రం ఆంక్షలు విధించింది. 200 మిల్లీలీటర్ల శానిటైజర్ను రూ.100కే విక్రయించాలని, మాస్కు గరిష్ఠ ధర రూ.8గా నిర్దేశిస్తూ కేంద్రం ప్రకటన విడుదల చేసింది. కరోనా నేపథ్యంలో అత్యవసరమైన ఔషధాలను భారత్లోనే తయారు చేయాలని దేశీయ సంస్థలకు సూచించారు ప్రధాని మోదీ. ఈ మేరకు వివిధ పథకాల కింద రూ.14 వేల కోట్లు కేటాయిస్తున్నట్లు తెలిపారు.
కొవిడ్19కి సంబంధించిన ఆర్ఎన్ఏ డయాగ్నస్టిక్ కిట్లను యుద్ధ ప్రాతిపదికన తయారు చేయాలని ఔషధ సంస్థలకు సూచించారు మోదీ. కొవిడ్-19 నిర్ధరణ పరీక్షల ఖర్చు కూడా రూ.4,500 కోట్లకు మించరాదని ప్రైవేట్ ల్యాబులకు కేంద్రం సూచించింది.
విదేశాల్లోని భారతీయులపై..
భారత్లో గత అర్ధరాత్రి నుంచి అంతర్జాతీయ విమానసేవలు రద్దుకాగా ఆయా దేశాల్లో ఉన్న భారతీయులు కరోనా వ్యాప్తి చెందకుండా అన్ని జాగ్రత్తలు తీసుకోవాలని వివిధ దేశాల్లోని భారత రాయబార కార్యాలయాలు సూచించాయి. వారికోసం ప్రత్యేక హెల్ప్లైన్లు ప్రారంభించాయి. మలేసియాలో చిక్కుకుపోయిన వందలాది మంది భారతీయులను సురక్షిత ప్రాంతాలకు తరలించారు.
