'శబరిమలపై ఆర్డినెన్సు ఎందుకు తీసుకురారు?'

శబరిమల వివాదంపై కాంగ్రెస్​ మరోసారి ప్రధాని నరేంద్రమోదీపై ప్రశ్నల వర్షం కురిపించింది. పార్లమెంటు​లో శబరిమలపై ఒక్కమాట మాట్లాడని ప్రధాని... ఎన్నికలు వచ్చే సరికి ఈ విషయంపై ప్రత్యేక శ్రద్ధ చూపిస్తున్నారని ఆరోపించింది.

శబరిమల వివాదాన్ని ఎన్నికల వేళ కాంగ్రెస్​ మరోమారు తెరపైకి తీసుకొచ్చింది. అయ్యప్ప పేరుతో భాజపా ఆడిన నాటకాన్ని ప్రజలు సహించబోరని హెచ్చరించారు కాంగ్రెస్​ నాయకులు. శబరిమల భక్తులను ప్రధాని నరేంద్రమోదీ మోసం చేశారని ఏఐసీసీ ప్రధాన కార్యదర్శి కేసీ వేణుగోపాల్​ ఆరోపించారు. ఎన్నికల సమయంలో మాత్రమే శబరిమల పట్ల ప్రధాని అత్యంత శ్రద్ధ చూపిస్తారని ఎద్దేవా చేశారు. ముమ్మారు తలాఖ్​​ మాదిరిగానే శబరిమల విషయంలోనూ ఆర్డినెన్స్​ తీసుకొచ్చేందుకు ప్రభుత్వం ఎందుకు సాహసించడం లేదని ప్రశ్నించారు.

" శబరిమల విషయంపై ప్రధాని ఎందుకు నాటకాలాడుతున్నారు? పార్లమెంటు​లో జనవరి 4న ఇదే అంశాన్ని లేవనెత్తాను. భక్తుల నమ్మకాలను రక్షించేందుకు ప్రభుత్వం కలుగజేసుకోవాలని కోరాను. ప్రధాని గానీ, ఆయన మంత్రులు గానీ శబరిమల అంశంపై పార్లమెంటులో ఒక్క మాటైనా మాట్లాడారా? "
- కేసీ వేణుగోపాల్​, ఏఐసీసీ ప్రధాన కార్యదర్శి