కాంగ్రెస్ పార్టీ జాతీయాధ్యక్ష పదవికి రాజీనామా చేస్తూ తీసుకున్న నిర్ణయంపై వెనక్కి తగ్గడం లేదు రాహుల్ గాంధీ. సోనియా గాంధీ నేతృత్వంలో నేడు కాంగ్రెస్ పార్టీ పార్లమెంటరీ భేటీలో జరిగింది. ఈ సందర్భంగా రాజీనామాను వెనక్కి తీసుకోవాలని ఎంపీలు రాహుల్ను కోరగా, తాను పదవి నుంచి వైదొలిగేందుకే నిర్ణయించుకున్నానని రాహుల్ మరోసారి తేల్చి చెప్పినట్టు సమాచారం.
పార్టీ వైఫల్యానికి అందరం కలిసి బాధ్యత తీసుకుందామని ఎంపీలు శశిథరూర్, మనోజ్ తివారీ చెప్పినా రాహుల్ వినలేదని తెలిసింది.
సార్వత్రిక ఎన్నికల్లో హస్తం పార్టీ కేవలం 52లోక్సభ స్థానాలను సాధించి.. ఘోర వైఫల్యం చెందింది. మనస్థాపం చెందిన రాహుల్ గాంధీ.. అధ్యక్ష పదవికి రాజీనామా చేశారు. మరొకరిని పదవికి ఎంపిక చేయాలని పార్టీకి సూచించారు. రాజీనామాను తిరస్కరించి... అధ్యక్షుడిగా మీరే ఉండాలని సీడబ్ల్యూసీ సూచించినా ఆయన మనసు మార్చుకోలేదు. ఈ నేపథ్యంలో అశోక్ గహ్లోత్ పార్టీ అధ్యక్షుడిగా నియమితులవుతారన్న వాదనలు బలంగా వినిపిస్తున్నాయి.
పోరాడండి.. మీ వెంటే ఉంటాం
పార్టీ అధ్యక్ష పదవికి చేసిన రాజీనామాను వెనక్కి తీసుకోవాలని విన్నవిస్తూ రాహుల్ గాంధీ నివాసం ఎదుట యూత్ కాంగ్రెస్ నేతలు, కార్యకర్తలు నేడు ఆందోళన చేపట్టారు. 'పోరాడండి.. మేం మీ వెంటే ఉంటాం' అని నినాదాలు చేశారు. దేశానికి రాహుల్ గాంధీ అవసరముందుంటూ ప్లకార్డులు ప్రదర్శించారు.
ఇదీ చూడండి : జై శంకర్, అజిత్ డోభాల్తో పాంపియో చర్చలు
