తాజ్మహల్ వద్ద కోతుల బెడద తీవ్రంగా ఉందని పర్యటకులు చెబుతున్నారు. త్వరలో ట్రంప్ తాజమహల్ సందర్శన కారణంగా కోతుల సమస్య లేకుండా జాగ్రత్తలు తీసుకోవాలని సూచిస్తున్నారు. దీనిపై సీఐఎస్ఎఫ్ కమాండెంట్ బ్రిజ్ భూషణ్ స్పందించారు.
తాజ్మహల్ వద్ద కోతుల బెడద లేదని తెలిపారు భూషణ్. కొంతకాలంగా కోతుల సమస్య తగ్గిందని, ట్రంప్ సందర్శన సమయంలో మరిన్ని జాగ్రత్తలు తీసుకుంటామని చెప్పారు.
"ఆరు నెలలుగా తాజ్మహల్ పరిసరాల్లో కోతుల బెడద తగ్గింది. ట్రంప్ పర్యటన సమయంలో సందర్శకులకు అనుమతి ఉండదు. కోతుల సమస్య లేకుండా తగిన జాగ్రత్తలు తీసుకుంటున్నాం."
-బ్రిజ్ భూషణ్, సీఐఎస్ఎఫ్ కమాండెంట్
కేంద్ర పారా మిలటరీ, సీఐఎస్ఎఫ్ సిబ్బందితో తాజ్మహల్ వద్ద భారీ భద్రత ఏర్పాటు చేస్తున్నారు. కోతులు తమ వస్తువులను ఎత్తుకెళ్లి ఇబ్బందులకు గురిచేస్తున్నాయని పర్యటకులు ఫిర్యాదు చేయడం వల్ల భద్రత మరింత పెంచారు.
"తాజ్మహల్ వద్ద కోతులు పర్యటకులను చాలా ఇబ్బందులకు గురిచేస్తున్నాయి. అధికారులు ఈ విషయంపై ప్రత్యేక దృష్టి సారించాలి. అమెరికా అధ్యక్షుడు వచ్చినప్పుడు కోతుల సమస్య ఇలాగే ఉంటే చాలా ఇబ్బంది అవుతుంది. వాటికి తెలియదుగా ట్రంప్ అమెరికా అధ్యక్షుడని."
-తన్వీర్, పర్యటకుడు
ట్రంప్ సందర్శన నేపథ్యంలో ఈనెల 24వ తేదీన మధ్యాహ్నం 12 నుంచి 24 గంటల పాటు తాజ్మహల్ సందర్శనపై అధికారులు ఆంక్షలు విధించారు.
ఇదీ చదవండి: నమస్తే ట్రంప్: తాజ్మహల్ దారిపొడవునా ఆయన బొమ్మలే
