లెబనాన్ బీరుట్ పేలుళ్ల ఘటన ప్రపంచవ్యాప్తంగా కలకలం రేపింది. ఈ నేపథ్యంలో తమిళనాడు రాజధాని చెన్నై ఓడరేవులో దాదాపు 700 టన్నుల అమోనియం నైట్రేట్ నిల్వ ఉన్నట్టు తేలడం సర్వత్రా భయాందోళనకు కారణమైంది. తాజాగా.. ఆ అమోనియన్ నైట్రేట్ను దశలవారీగా అక్కడి నుంచి తరలించడానికి అధికారులు చర్యలు చేపట్టారు. దాదాపు మూడొంతుల నిల్వను హైదరాబాద్కు తరలిస్తున్నారు. ఇందుకు సంబంధించిన కంటైనర్ ఆదివారమే బయలుదేరిందని చెన్నై పోలీస్ కమీషనర్ మహేష్ కుమార్ వెల్లడించారు.
మొదటి బ్యాచ్లో భాగంగా.. 200 టన్నులకుపైగా అమోనియమ్ నైట్రేట్ను 10 కంటైనర్లలో తరలించారు. మిగిలిన 27 కంటైనర్లను రానున్న రెండు రోజుల్లో చెన్నై నుంచి తరలించనున్నట్టు మహేష్ కుమార్ తెలిపారు.
అయితే ఈ విషయంలో ప్రజలు భయపడకూడదని పోలీస్ కమీషనర్ సూచించారు. కస్టమ్స్ అధికారులు అన్ని జాగ్రత్తలు తీసుకుంటున్నారని స్పష్టం చేశారు. ప్రయాణంలో ఇబ్బందులు ఎదురవుతాయనే కారణంతోనే దశలవారీగా ఈ ప్రక్రియను పూర్తి చేయనున్నట్టు తెలిపారు మహేష్ కుమార్.
శ్రీ అమ్మన్ కెమికల్స్ అనే సంస్థ.. 2015లో దక్షిణ కొరియా నుంచి అక్రమంగా దిగుమతి చేసుకోవడం వల్ల 700 టన్నుల అమోనియం నైట్రేట్ను సీజ్ చేశారు. దీని విలువ సుమారు రూ.2 కోట్లు. బీరుట్ ఘటనతో ఈ విషయం మళ్లీ బయటకు వచ్చింది.
ఈ నేపథ్యంలో ఈ మొత్తం నిల్వపై వేలం నిర్వహించారు కస్టమ్స్ అధికరులు. హైదరాబాద్కు చెందిన సాల్వో ఎక్స్ప్లోజివ్స్ అండ్ కెమికల్స్ దీనిని సొంతం చేసుకుంది.
ఇదీ చూడండి:- ఆ పేలుడుకు అణుబాంబులో ఐదోవంతు శక్తి..!
