దేశంలో కరోనా వైరస్ విజృంభిస్తున్న వేళ.. ఆరోగ్య సిబ్బందిపై జరుగుతున్న దాడులను అరికట్టడానికి కేంద్రం కీలక నిర్ణయం తీసుకుంది. ఆరోగ్య సిబ్బంది రక్షణ కోసం ప్రత్యేక ఆర్డినెన్సును తీసుకొచ్చింది. దీని ప్రకారం ఎవరైనా దోషులుగా తేలితే.. వారికి 6 నెలల నుంచి 7ఏళ్ల పాటు జైలు శిక్ష విధించనుంది. రూ. లక్ష నుంచి రూ.8 లక్షల వరకు జరిమానా చెల్లించాల్సి ఉంటుంది. బుధవారం జరిగిన కేబినెట్ సమావేశంలో దీనికి ఆమోద ముద్ర వేసింది కేంద్రం. రాష్ట్రప్రతి సంతకం తర్వాత ఈ ఆర్డినెన్స్ అమల్లోకి రానుంది.
ఆరోగ్య సిబ్బందిపై జరుగుతున్న దాడులు దురదృష్టకరమన్నారు కేంద్రమంత్రి ప్రకాశ్ జావడేకర్. వారిపై ఎవరైనా హింసకు పాల్పడితే కఠిన చర్యలు తప్పవని స్పష్టం చేశారు. వైద్యులపై దాడికి సంబంధించన ఘటనలు నాన్ బెయిలెబుల్ కేసులుగా పరిగణించనున్నట్టు పేర్కొన్నారు.
కరోనా విధుల్లో ఉన్న అన్ని రకాల ఆరోగ్య సిబ్బందికి రూ.50లక్షల వరకు వైద్య బీమా ఉంటుందని జావడేకర్ తెలిపారు. అలాగే బాధితులకు ఆయుష్మాన్ పథకం కింద చికిత్స అందించనున్నట్టు వివరించారు.
ఇదీ చూడండి:- ఆరోగ్య రంగానికి కరోనా నేర్పిన పాఠాలివే...
