దిల్లీలోని సెంట్రల్ బోర్డ్ ఆఫ్ సెకండరీ ఎడ్యుకేషన్(సీబీఎస్ఈ) దేశవ్యాప్తంగా పదవ తరగతి ఫలితాల విడుదల తేదీ ప్రకటించింది. జులై 15న ఫలితాలు వెల్లడించనున్నట్లు స్పష్టం చేసింది. ఈ మేరకు మానవ వనరుల అభివృద్ధి శాఖ మంత్రి రమేశ్ పోఖ్రియాల్ 'నిషాంక్' ట్విట్టర్లో ఓ పోస్ట్ చేశారు.
"ప్రియమైన విద్యార్థులు, తల్లిదండ్రులు, ఉపాధ్యాయులు... సీబీఎస్ఈ ఫలితాల విడుదల రేపే. పదో తరగతి విద్యార్థులందరికీ బెస్ట్ ఆఫ్ లక్"
-రమేశ్ పోఖ్రియాల్, మానవ వనరుల అభివృద్ధి శాఖ మంత్రి
కరోనా మహమ్మారి నేపథ్యంలో పరీక్షలను రద్దు చేసిన సీబీఎస్ఈ బోర్డు.. విద్యార్థులు పూర్వ పరీక్షల్లో సాధించిన మార్కుల ఆధారంగా ఫలితాలను ప్రకటించనుంది.
కరోనా సంక్షోభం కారణంగా మిగిలిన పరీక్షలను రద్దు చేసేందుకు సుప్రీంకోర్టు అనుమతించిన తర్వాత సీబీఎస్ఈ బోర్డు కొన్ని మార్గదర్శకాలను విడుదల చేసింది. అవేంటంటే..
- అన్ని పరీక్షలు రాసిన 10, 12 తరగతి విద్యార్థుల ఫలితాలను యథావిధిగా ప్రకటిస్తారు.
- మూడు లేదా అంతకంటే ఎక్కువ సబ్జెక్టులు రాసిన విద్యార్థులకు మాత్రం.. అత్యుత్తమ మార్కులు సాధించిన మూడు సబ్జెక్టుల సగటు ఆధారంగా ప్రతిభను మదింపు చేస్తారు.
- 3 సబ్జెక్టులకు మాత్రమే హాజరైన విద్యార్థులకు.. 2 సబ్జెక్టులలో సాధించిన అత్యుత్తమ మార్కుల సగటు, అంతర్గత, ప్రాక్టికల్‌ పరీక్షల్లో ప్రతిభ ఆధారంగా తుది మార్కులు కేటాయిస్తారు.
- 12వ తరగతి విద్యార్థులకు సీబీఎస్ఈ బోర్డు ఇంకో అవకాశాన్ని ఇచ్చింది. మదింపు ఆధారంగా వచ్చిన మార్కులపై అసంతృప్తిగా ఉంటే.. ఆ విద్యార్థులకు మళ్లీ పరీక్షలు నిర్వహించనుంది. పదో తరగతి విద్యార్థులకు మాత్రం ఇంప్రూవ్‌మెంట్‌ పరీక్షలు రాసే అవకాశం లేదని బోర్డు ఇదివరకే స్పష్టం చేసింది.
ఇదీ చదవండి: సీబీఎస్ఈ ఫైనల్ మార్కులు లెక్కిస్తారిలా...
