ఆత్మనిర్భర్ భారత్ రోజ్గార్ యోజనకు కేంద్ర మంత్రివర్గం ఆమోదం తెలిపింది. ఈ ఆర్థిక సంవత్సరానికి రూ. 1584 కోట్లు కేటాయించింది. మొత్తం పథకానికి రూ. 22 వేల 810 కోట్లు వెచ్చించనున్నట్లు పేర్కొంది. ఈ నిర్ణయంతో 58.5 లక్షల మంది ఉద్యోగులకు లబ్ధి చేకూరనున్నట్లు కేంద్ర కార్మిక శాఖ మంత్రి సంతోష్ గంగ్వార్ వెల్లడించారు.
కొత్త ఉపాధి అవకాశాలను మెరుగుపరచడమే లక్ష్యంగా కేంద్రం ఈ పథకాన్ని తీసుకొచ్చింది. ఇందులో భాగంగా కొత్త నియామకాలు చేపడితే.. రెండేళ్ల వరకు ఉద్యోగి, యజమాని వాటా కింద పదవీ విరమణ నిధికి జమ చేయాల్సిన మొత్తాన్ని ప్రభుత్వమే అందిస్తుంది.
ఆత్మనిర్భర్ భారత్ రోజ్గార్ యోజన అంటే..?
- ఈపీఎఫ్ఐ పరిధిలోని సంస్థ కొత్త ఉద్యోగిని(గతంలో పీఎఫ్లో చేరనివారు లేదా ఉద్యోగం కోల్పోయిన వారు) చేర్చుకుంటే.. సంస్థకు, ఉద్యోగికి పీఎఫ్ కంట్రిబ్యూషన్లో రాయితీ.
- రెండేళ్ల పాటు సంస్థ-ఉద్యోగుల కంట్రిబ్యూషన్లు (24శాతం) ఆయా సంస్థలకు అందజేత.
- ఈపీఎఫ్ఓలో నమోదు చేసుకున్న సంస్థల్లో రూ. 15వేలు కన్నా తక్కువ జీతానికి చేరిన కొత్త ఉద్యోగికి వర్తింపు.
- కరోనా వల్ల 2020 మార్చి 1 అనంతరం ఉద్యోగం కోల్పోయి.. 2020 అక్టోబర్ 1 తర్వాత తిరిగి ఉద్యోగంలో చేరిన వారు(రూ. 10వేల కన్నా తక్కువ జీతం) కూడా ఈ పథకం పరిధిలోకి వస్తారు.
- నిబంధన:- కనీసం 2 కొత్త ఉద్యోగాలు(50 కన్నా తక్కువ సిబ్బంది ఉన్న సంస్థలు), కనీసం 5 కొత్త ఉద్యోగాలు(సిబ్బంది 50కు పైబడిన సంస్థలు).
- 2021 జూన్ 30 వరకు ఈ పథకం అమలు.
ఇదీ చూడండి: 'మధ్యతరగతి'కి కేంద్రం 'ఆత్మనిర్భర్' కానుక
వైఫై విస్తరణ..
దేశంలో మారుమూల ప్రాంతాలకు వేగవంతమైన వైఫై సేవలను అందించేందుకు పీఎం వైఫై యాక్సెస్ నెట్వర్క్ ఇంటర్ఫేస్(పీఎం వాని) పథకానికి కేంద్ర మంత్రివర్గం ఆమోదం తెలిపింది. వైఫై నెట్వర్క్ను పెద్దఎత్తున విస్తరించాలని నిర్ణయించింది. వైఫై కోసం ఎలాంటి లైసెన్సులు, రిజిస్ట్రేషన్లు ఉండబోవని స్పష్టం చేసింది. విస్తరణలో భాగంగా కోటి డేటా సెంటర్లు ఏర్పాటు చేయనున్నట్లు ఐటీ శాఖ మంత్రి రవిశంకర్ ప్రసాద్ తెలిపారు.
లక్షద్వీప్నకు వేగవంతమైన అంతర్జాల బ్రాడ్బ్యాండ్ సేవలను అందించేందుకు సముద్ర గర్భ ఆప్టికల్‌ ఫైబర్‌ కేబుల్‌ను ఏర్పాటు చేయాలని కూడా మంత్రివర్గం నిర్ణయించింది.
