భారత్-పాకిస్థాన్ అంతర్జాతీయ సరిహద్దు వెంట దాయాదికి చెందిన ఓ డ్రోన్ను కూల్చేసింది సరిహద్దు భద్రతా దళం(బీఎస్ఎఫ్). కథువా జిల్లా పన్సార్ ఔట్ పోస్ట్ పైనుంచి ఎగురుతూ వెళ్తున్న పాక్ డ్రోన్ను గమనించిన సిబ్బంది ఉదయం 5.10 గంటలకు నేలకూల్చారు.
డ్రోన్ను పరిశీలించిన అనంతరం ఆయుధాల అక్రమ రవాణా చేస్తున్నట్లు గుర్తించారు. ఇందులో ఓ అధునాతన తుపాకీ, 60 రౌండ్ల తూటాలు, 7 గ్రనేడ్లను స్వాధీనం చేసుకున్నారు. పన్సార్ వద్ద సరిహద్దుకు అవతలి వైపు నుంచి భారత్లో ఉన్న పాక్ ఏజెంట్లకు అందించేందుకే డ్రోన్ ద్వారా ఆయుధాలను అక్రమంగా రవాణా చేస్తున్నట్లు భావిస్తున్నామని వెల్లడించారు బీఎస్ఎఫ్ అధికారులు.
ఈ అనుమానాస్పద పాక్ డ్రోన్ 250 మీటర్ల మేర భారత్లోకి చొచ్చుకొచ్చిందని.. తొమ్మిది రౌండ్ల కాల్పులు జరిపిన అనంతరం నేలకూలిందని చెప్పింది సైన్యం. ఘటనా స్థలానికి వెళ్లిన సీనియర్ బీఎస్ఎఫ్ అధికారులు దర్యాప్తునకు ఆదేశించారు.
భారత్ లక్ష్యంగా కాల్పులు..
ఇదే సమయంలో.. పాక్ మరోసారి తన వక్రబుద్ధిని చాటుకుంది. సరిహద్దు వెంట ఉన్న హీరానగర్ సెక్టార్లోని బాబియా పోస్ట్ లక్ష్యంగా కాల్పులు జరిపింది. అయితే పాక్ కవ్వింపు చర్యలకు బీఎస్ఎఫ్ దళాలు ప్రతిస్పందించలేదు.
ఇదీ చూడండి: 'సరిహద్దుల్లో తలెత్తే ఎలాంటి పరిస్థితికైనా వాయుసేన సిద్ధం'
