నూతన సాగు చట్టాలను రద్దు చేయాలని డిమాండ్ చేస్తూ భారీ సంఖ్యలో రైతులు ఘాజీపుర్ సరిహద్దుకు తరలివస్తున్నారు. ఉత్తర్ప్రదేశ్ సహా.. రాజస్థాన్, హరియాణా రాష్ట్రాల నుంచి పెద్దఎత్తున దిల్లీ సరిహద్దులో రైతులు చేపడుతున్న ప్రాంతానికి చేరుకుంటున్నారు.
భారతీయ కిసాన్ యూనియన్(బీకేయూ) ఆధ్వర్యంలో జరుగుతున్న ఈ ఆందోళనలు ట్రాక్టర్ ర్యాలీ తర్వాత కాస్త బలహీన పడినట్టు అనిపించినప్పటికీ నిరసనల్లో పాల్గొనేందుకు రైతులు భారీగా వచ్చిచేరుతున్నారు. వీరంతా దిల్లీ-మేరఠ్ ఎక్స్ప్రెస్ హైవేపై బస చేశారు. ముజఫర్నగర్లో శనివారం నిర్వహించిన 'రైతుల మహాపంచాయత్' అనంతరం కర్షకులు దీక్షాస్థలికి పోటెత్తుతున్నారు.
" రైతు ఉద్యమం బలంగానే ఉంది. ఇది రాజకీయ ఆందోళన కాదు. శాంతియుత నిరసనలకు దేశవ్యాప్త మద్దతు లభిస్తోంది. నిరసనలకు సంఘీభావంగా అనేక మంది రైతులు తరలివస్తున్నారు."
- పవన్ ఖత్నా, మీరట్ బీకేయూ నేత
వారు అవసరం లేదు..
ఉద్యమాన్ని మధ్యలో వదిలి వెళ్లేవారు దయచేసి రావద్దని పవన్ ఖత్నా విజ్ఞప్తి చేశారు. మాతో కలసి పనిచేయాలనుకునే వారికి.. పరస్పర భావజాలం ఉన్నవారికి స్వాగతం ఉంటుందన్నారు. చివరి వరకు ఉద్యమం కొనసాగడం ఇష్టంలేని వారు అవసరం లేదని స్పష్టం చేశారు.
మరోవైపు శనివారం సాయంత్రం వరకు దాదాపు 5 వేలమంది రైతులు గాజీపుర్ చేరుకుంటారని పోలీసులు అంచనా వేయగా.. సుమారు పదివేల మంది వస్తారని బీకేయూ నేతలు చెబుతున్నారు.
భారీ బందోస్తు..
పటిష్ట బందోబస్తు ఏర్పాటు చేసిన ప్రభుత్వం.. స్థానిక పోలీసులతో పాటు, ర్యాపిడ్ యాక్షన్ ఫోర్స్, సాయుధ దళాలను నిరసనలు జరిగే ప్రాంతంలో మోహరించింది.
మరోవైపు దిల్లీ-మేరఠ్ ఎక్స్ప్రెస్ హైవేపై రాకపోకలకు అనుమతి లేదని దిల్లీ పోలీసు విభాగం ప్రకటించింది.
ఇదీ చదవండి: దిల్లీ సరిహద్దులో రైతుల ఉపవాస దీక్ష
